SI KONGRESISTA Alan Peter Cayetano maoy gipili ni Presidente Rodrigo Duterte nga mahimong sunod nga House of Representatives Speaker puli kang kanhi presidente Gloria Arroyo. Apan si Cayetano mulingkod sa maong pwesto sud lamang sa 15 ka buwan.
Sa samang higayon, gipahibawo sa presidente nga si Congressman Lord Allan Velasco mao na usab ang mulingkod pagka-speaker sud sa 21 ka buwan hangtud matapus ang ilang termino. Kini magsugod human sa election karong Hulyo 22 sa buntag sa dili pa mo-deliver ang presidente sa ika-upat niyang State of the Nation Address (SONA) nga maoy mag-abli sa 18th Congress. Masabut nga si Cayetano mao ang unang butohan sa mga kongresista sa pagka-speaker. Human sa 15 ka buwan mag-eleksiyon sila pag-usab aron pagpili kang Velasco nga mao na usab ang mopuli sa pagka Speaker. Unsa man ang paagi niini? Aduna bay kasabutan nga pirmahan nila ni Cayetano ug Velasco o ibasi ba lang kini sa pamahayag sa Presidente? Wala kini ikulit sa bato sa ato pa mahimong dili matuman kining maong kasabutan. Apan sayud kita nga ang mga sakop sa majority coalition sa Ubos Balay-Balauranan ubos sa mando sa Presidente. Bisan unsaon sa pagpanghambug ni Cayetano nga independente sila og baruganan apan dili malalis nga kon unsay mga balaudnon nga gusto sa Presidente mapasar gayud samtang dili gayud makalusot ang mga balaudnon nga mosupak sa baruganan ni Presidente Duterte kalabut sa West Philippine Sea, extra-judicial killing ug uban pa. Kini maoy mahitabo diha sa Ubos Balay-Balauranan ug bisan gani sa Senado. Bisan si Kongresista Paolo Duterte ug si Davao City Mayor Sara Duterte Carpio, nga supak unta niining term-sharing, wala gayuy pamahayag batok sa baruganan sa ilang amahan. Wa gyuy arang kang Digong.
•••
Si Lapulapu City Mayor Junard “Ahong” Chan mihatag sa iyang inaugural address sa 15th Sangguniang Panglunsod niadtong Biyernes Hulyo 5. Unom sa 14 ka mga konsehal ang wa motambung sa maong sesiyon. Sila mga sakop sa Team Deretso ni kanhi mayor karon Kongresista Paz Radaza. Ambut og unsay katarungan niining unom apan mitambong ang ilang mga kauban sa partido nga sila si Efren Amores. Ricardo Paquibot, Jr. , Queenie Malingin-Amman, Efren Herrera, kanhi bise mayor Marcial Ycong ug Alexander Gestopa, Jr. Of course, mitambong usab ang duha ka sakop sa Team Libre ni Mayor Chan nga si Jan Vincent Dela Serna ug Nelson Yap. Ang wa motambong mao sila si Rudy Potot, Flaviano Hiyas, Jose Dungog, Rex Mangubat, ABC president Eduardo Cuizon ug SK chairperson Laika Tampus. Bisan tuod og mipahibawo ang maong mga konsehal nganong dili sila makatambong apan dili kalikayan nga magduda ang katawhan kay gidungog nga mo-boycott sila tungod sa isyu kalabut sa wa pagtugot ni Mayor Chan nga mo-opisina si Kong. Paz Radaza sa buhatan nga gi-ukopahan kaniadto sa iyang anak nga si kanhi Kongresista Aileen Radaza. Hinaut pang ipadaplin usa nila ang pamulitika ug maghiusa alang sa pagserbisyo sa mga Oponganon. (mannyrabacal1144@gmail.com)