HUMAN natuman ang gisaad ni Presidente Rodrigo Duterte nga doblehon ang sweldo sa mga pulis, misulbong usab ang claims sa mga babaye nga nalambigit, asawa o kabit, niini kay nangayo og suporta nga pinansyal.
Gireklamo ang mga pulis kay nabiyaan ang ilang responsibilidad nga mao ang pagsuporta sa ilang anak, sud o gawas man sa kaminyuon.
Matod sa Camp Crame, ilang nasabtan nga kaniadto, wa kaayoy nagpakabana og claim kay nakahibawo sila nga gamay rag sweldo ang pulis. Karon nga hapit na gidoble, duna nay nang-claim og suporta.
Ang pagbaton og laing babaye gawas sa kaminyuon, o pagkalambigit sa lainlaing babaye, usa sa mga hinungdan nganong ang usa ka pulis mangita og laing tinubdan sa income. Nagkinahanglan siya niini aron isuporta sa panginahanglan sa iyang duha o sobra pa nga pamilya.
Gawas kini sa bisyo sama sa sugal ug illegal drugs.
Bisan i-profile pa ang mga pulis nga scalawag, seguradong sagad kanila babaero, sugarol ug nalambigit sa illegal drugs.
Gikinahanglan sa kadagkuan sa Philippine National Police (PNP) nga maghimo og programa aron pagtul-id sa mga pulis aron di magbisyo o mobiya na sa bisyo kadtong mga bisyuso.
Bisan pa og pil-on og ka 10 ang sweldo sa kapulisan, magpabilin gihapon ang mga scalawag tungod kay kadaghanan kanila nagkinahanglan og kwarta tungod sa panginahanglan. Kon wa kining bisyo, maihap lang tingali ang scalawag nga mga pulis.
Kon naay programa ang kapulisan nga spiritual, moral ug financial education ug uban pa nga makapalambo sa kinabuhi sa usa ka pulis, seguradong di na makadaku ang problema sa PNP.
Di sama karon nga bisan sa paninguha sa kadagkuan, naa lang gihapon ang mangilkilay, nalambigit sa illegal drugs ug uban pa. Maayong sugdan gilayon kini samtang naa pa ang momentum sa linimpyuhay sa han-ay sa kapulisan.