SECTIONS
Tuesday, July 16, 2019
SUPERBALITA CEBU

Super Suroy: Bahandi nga kabilin sa Sabtang Island

SA MIAGING edisyon sa Super Suroy sa Batanes, atong gibisita ang mga kanindot nga talan-awon sa North Batan, lalawigan sa Batanes.

Sa atong padayon nga pagsuroy, molabang kita ta sa isla sa Sabtang ang labing gamay sa tulo ka mga isla sa Batanes.

Gamay kini apan napuno mga bahandianong kultura ug kabilin.

Gihulagway ang dapit nga malinawon ug makapaluag sa huna-huna haom kini niadtong gipul-an o gikapoy sa city life.

Unsaon pag-adto

Gikan sa munisipalidad sa Basco, mamahimong mosakay og tricycle padulong sa pantalan sa munisipalidad sa Ivana, gibana-bana nga moabot sa P500 ang plete nga moabot ngadto sa 45 minutos ang biyahe.

Sa pantalan sa Ivana nagpaabot ang mga Faluwa, ang tradisyonal nga bangka sa Batanes, mokabat sa P100 ang one-way nga plitehan niini.

Ayaw lang kalimot og pa-reserve usa ka adlaw sa di pa mubiyahe aron masiguro nga makasakay ka sa buntag. Pasidaan lang sab sa higayon nga adunay dagkong balod.

Sa pag-abot sa isla, adunay mga tricycle nga accredited sa lokal nga kagamhan sa Sabtang nga andam muhatag og tour.

Ang imong bayad nga P1,500 good for two nga lakip na ang paniudto.

Karon nga andam na ang tanan, suroy na ta.

Mga hiyas sa Sabtang Island

Ang Sabtang nailhan tungod sa mga natukod nga karaang balay nga ginama sa bato nga padayong gipreserba sa mga Ivatan o mga Lumad sa Batanes.

Gitawag kini nila nga “Sinadumparan” nga unang gitukod niadtong panahon pa sa mga Kastila ang maong struktura ginama kini sa bato, corals, lime, ug cogon.

Gitukod ang maong mga balay isip proteksyon sa kusog nga hangin nga dala sa mga bagyo nga kanunay moigo sa Batanes.

Gipasigarbo sa lokal nga kagamhanan sa munisipalidad sa Sabtang ang Barangay Savidug ug Chavayan tungod sa mga nagpabiling Sinadumparan nga hangtod karon gipuy-an pa sa mga Ivatan.

Makita sa Barangay Savidug ang St. Thomas Aquinas Chapel ug tupad niini ang Old Beaterio o balay sa mga pari.

Abandonado na ang Old Beaterio apan mamahimo ka mosulod niini ug molantaw sa bintana aron makapahulagway.

Samtang ang Barangay Chavayan ang adunay labing daghan nga Sinadumparan nga napreserba ug makita sab dinhi ang Kissing Rocks o mga bato nga naporma susama sa naghalok nga tawo.

Anaa sab sa Savidug ang Sabtang Weavers Association diin mamahimong mopalit o moabang og “Vakul” o purong nga gamit sa mga Ivatan nga ginama sa Palm tree nga lumad sa Batanes.

Mapalit sab dinhi ang ilang nitibo o tradisyonal nila nga tsinelas nga gitawag og “Chavayanas.”

Gawas sa mga karaang balay nga ginama sa bato, bantugan sab ang Sabtang sa pipila ka mga nindot nga talan-awon.

Usa na niini ang Morong Beach o naila sab sa ngalan nga Nakabuang Beach, makita ang Nakabuang Arch o Mahayaw Arch.

Mamahimong magpahulagway niini, apan gikinahanglan nimo molinya aron ma-solo nimo ang view.

Samtang nagbiyahe sa isla, ayaw kalimot og lantaw sa gawas aron inyong makit-an ang usa ka bungtod nga naporma susama sa naghigda nga babaye nga gitawag nila og “Sleeping Beauty of Sabtang.”

Ilabi na sa tanan, ayaw sipyata ang Chamantad-tinyan Viewpoint, usa kini sa mga lugar sa Sabtang nga madani gayud ka sa kanindot.

Lapad ang maong tourist spot, presko ang hangin, ug aduna kini pipila ka mga area nga maghatag og nagkadaiyang nindot nga talan-awon nga iya sa kinaiyahan.

Malantawan dinhi ang Chamantad Cove sa ubos diin makita ang paghampak sa mga balod ngadto sa mga bato sa baybayon. Picture-perfect gayud!

Sa inyong pagbalik sa pantalan paingon sa munisipalidad sa Ivana, ayaw kalimot og hapit sa Sabtang Lightouse nga usa sa mga naunang estraktura sa isla nga ginama sa tawo.

Sa sunod nga edisyon sa Super Suroy sa Batanes, mubalik ta sa isla sa Batan ug atong suroyon ang habagatang bahin niini.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph