DAKBAYAN sa Mandaue nangita na og posibleng kalabayan sa basura human mipadayag ang Cebu City Government nga di na padawaton og basura ang ARN Builders nga tag-iya sa landfill sa Barangay Binaliw gikan sa Mandaue ug ubang local governments.
Si Attorney Eddu Ibañez, executive secretary ni Mandaue City Mayor Jonas Cortes, nagkanayon nga kini di lang problema sa usa ka siyudad o lungsod.
Plano usab nilang makighinabi sa Cebu City ubos ni Mayor Edgardo Labella aron mangayo og konsiderasyon sa ilang desisyon.
“Sa Cebu City since ila man na, respeto gyud ta ana. Pero sa pagkakaron we are looking into other options para sa atoang basura kay di raman kami ang nag problema aning basura. For now, usa sa atong gi-consider ang mga private haulers nga maoy mokuha sa atong basura,” matod ni Ibañez.
Gikonsiderar usab nila ang pagkuha og mga private haulers sa paglabay sa basura.
Usa usab sa ilang gitan-aw nga alternatibo mao ang Asian Energy Systems Corp., sanitary landfill sa lungsod sa Consolacion, nga nakadawat og ceast-and-desist order niadtong May 7, 2019 gikan sa Environmental Management Bureau (EMB) human masuta nga adunay kalapasan sa environmental laws.
“I believe they’re processing their papers para ma-lift ang cease-and-desist order. Unya mao na lang nay atong ipangutana sa DENR for updates”, matod pa ni Ibañez. (ANV, Leonor Jorge ug Jessa Mae Genobisa CNU Comm. Interns)