GITANGTANG sa katungdanan ang usa ka traffic enforcer sa Dakbayan sa Talisay nga nasakpan sa mga netizen nga wa mag-helmet samtang nagmaneho sa iyang motorsiklo.
Kini taliwa sa estriktong pagpatuman sa “no helmet, no driving” sa City of Talisay-Traffic Operations and Development Authority (CT-TODA) nga gipangulohan ni Jonathan Tumulak.
Si Tumulak, sa interbyu sa Superbalita Cebu, niingon nga nagsilbi kining warning sa uban pang mga sakop sa CT-TODA nga di mag-abusar sa ilang katungdanan.
Matod ni Tumulak nga wa silay gidapigan bisan kon sakop pa kini sa CT-TODA.
Tungod kay seryuso ug hugot ang pagpatuman ni Mayor Gerald Anthony “Samsam” Gullas sa balaod sa trapiko, way bisan usa nga ma-exempt.
Sigon ni Tumulak nga gitangtang ang traffic enforcer tungod sa maong kalapasan.
Apan gibalhin kini sa Civil Security Unit nga mas ubos ang sweldo itandi sa enforcer.
Ang traffic enforcer nakit-an nga way helmet samtang nagmaniho sa iyang motorsiklo sa may Barangay San Isidro.
Gi-post ang hulagway niini sa duha ka mga babayeng netizen nga nakakita.
Si Gullas nga nakakita niini nipatawag sa enforcer ug gipaisyuhan og citation ticket.
Gipamulta siya og P500.
Ang enforcer, kinsang ngan gipapugngan sa Kagamhanan sa Dakbayan, nangatarungan nga iyang nalimtan ang helmet.
Ang traffic enforcer 10 ka tuig nang nangalagad sa Siyudad. (Cathleen Sumayang, CNU - Comm Intern)