HUMAN gipakaulawan kay gipangutana kon “kabalo ka mo-lulo?” ug gikataw-an sa ubang estudyante, usa ka menor nga lalaki ang nagdala og kutsilyo sa eskuwelahan, gihulga ang babayeng mi-bully kaniya, nga miresulta sab sa pagkaratol sa ubang magtutungha.
Sa report, Hulyo 11, nagkagubot ang pipila ka mga estudyante sa Soledad R. Duterte National High School tungod sa hitabo.
Suma pa nga samtang mikanaug sa silong ang maestrang si Mrs. Andrea Amor Gamorot, Grade 7 class adviser sa tunghaan, dinhi nahitabo ang pagtion og kutsilyo sa 16-anyos nga si alyas JP sa babayeng estudyante nga si alyas Juliet.
Sa report gikan kapulisan, nanawag ang ubang estudyante sa maestra tungod si alyas Juliet nagsige na og hilak.
Misulti kini nga gibaharan siya ni alyas JP dungan sa pagtion og 6 pulgadas nga kutsilyo.
Sa pagpanubay, nasayran nga dunay daang bangi ang duha, ug laing estudyante nga higala ni alyas Juliet nga si Nancy.
Suma pa gilabayan og notebook ni alyas Juliet si alyas JP, wa pay labot tong pagpangutana kaniyang “kabalo ka mo-lulo,” atubangan sa ubang estudyante nga gikaulaw og maayo sa menor.
Dason ni alyas JP nga nagdala siya og kutsilyo isip depensa tungod ang mga babaye may higala sab nga mga lalaki.
Dugang impormasyon, nagkanayon nga si alyas JP may kasong tulis sa Nabunturan, diin gi-turnover siya sa Nabunturan Bahay Pag-Asa, Oktubre 4, 2018 ug na-release, Hunyo 11, 2019, ug kasamtangang anaa sa kustodiya sa iyang iyaan sa Baliok, Davao City.
Tungod sa hitabo, miresulta sab kini sa pagkalisang sa ubang estudyante nga mitiyabaw ang uban, duna say nawad-an sa panimuot.
Anaa sa 27 ka babayeng estudyante ang giatiman sa 911 human kini wa kasagang sa panghitabo, mibati og kalisang.
Samtang si alyas JP gi-turnover sa iyang iyaan, diin temporaryo kining ipailawom sa modular exams ug home based study.
I-monitor sab siya sa iyang adviser matag bulan, lakip na sa social worker.