SA 74 KA sand and gravel permits nga giisyu sa kagamhanan sa lalawigan sa Sugbo, 73 niini pulos expired na apan, nagpadayon gihapon sa pagkubkob sa wala pa moluwat og kamandoan si Gobernador Gwen Garcia nga nagsuspenso sa tanang proseso sa tanang aplikasyon sa pag-isyu og permit ug nagpahunong sa tanang illegal nga quarrying operations.
“Ang uban dugay na kaayo maybe under process ang pag-renew. Pero ambot lang nganong dugay kaayo gi-renew. Unsa man duna pay kinahanglan mga “cashabotan,” matod sa gobernador dihang nahinabi sa mga tigbalita niadtong Huwebes, Hulyo 11.
Laing nadiskobrihan nila nga dunay mga kompanya nga lain ang industrial permit nga giisyu aron pagkuha og mineral o ore deposits, apan graba ang gibaligya.
Sigon ni Garcia nakit-an nila kini dihang naay usa ka trader ang nadakpan sa pulis sa habagatang Sugbo ug niadto sa Kapitolyo.
Matod sa gobernador nga base sa gisulti sa trader ngadto niya nga wa niya nganli, dugay na siya sa maong negosyo ug napalit niya ang graba gikan sa usa ka kompaniya.
Sumala ni Garcia dihang nabasa niya ang transport permit sa trader, ore ang nakabutang ug dili graba.
“Ingon ko “dili man graba ang nakasuwat diri, kato man nga ore kay ore transport pirme man ni.” Nakurat siya kay di man siya tigbasa basta kay naay transport permit,” saysay sa gobernador.
Sumala niya nakaduso na sila og reklamo ngadto sa Mines and Geosciences Bureau (MBG) sa Central Visayas bahin niini kay industrial permit ang giisyu ngadto sa maong kompaniya.
Alang sa small-scale commercial ug manual extractions nga ubos sa lima ka ektaryas, ang local government unit ang moisyu og permit. Kon large-scale quarrying na o sobra sa lima ka ektaryas, ang MGB na ang moisyu.
Ang gobernador nagpa-deploy og duha ka teams nga maoy nag-inspeksyon sa tanang quarry sites sa lalawigan sa Sugbo gamit ang drone, aron makuha ang tibuok hulagway ug kahimtang sa tanang quarry sites.
Human niini, i-assess ug i-evaluate kini nila uban sa Provincial Engineering Office, Provincial Planning and Development Office (PPDO), Provincial Environment and Natural Resources (Penro) ug uban sa tabang sa iyang mga consultant sama ni Atty. Rory Jon Sepulveda, ang kanhi gitudlo ni Garcia sa miaging administrasyon nga maoy tig-isyu sa mga permit.
Ang gobernador nidugang sa higayon ma-assess ug ma-evaluate na kini, ipatawag niya sa tigom ang tanang permitees apil kadtong nag-apply og extension sa ilang permits ug bag-ong aplikasyon ug ipakita tagsatagsa ang mga hulagway kon unsa nay hitsura sa ilang quarry sites.
“If there needs to be rehabilitation, they should undertake that immediately...And that’s the way it’s going to be. Regardless og dunay mga naalkansi sa negosyo,” sigon sa gobernador.
Siya nidugang sa dihang siya pa ang gobernador sa una, iya unang gipa-rehabilitate daan ang Hinulawan River sa siyudad sa Toledo sa wala pa sila moisyu balik og permit.
Ang gobernador namulong nga base sa iyang nadawat nga mga report grabe na ang namugna nga risgo sa kinabuhi sa mga tawo ug propiyedad ang quarry operations sa lalawigan nga nanimuyo duol niini, apan nagpaabot siya sa report sa inspection teams .
Iyang gipikhan ang mga contractor nga nireklamo nga naglisod na sa ilang construction human niya gipasuspenso ang proseso sa tanang aplikasyon sa sand and gravel (SAG) permits samtang i-review kini. (SCG)