MOKABAT sa 510 ka mga modernong public utility vehicle (PUV) ang magdagan na dinhi sa Sugbo sa di pa matapos ang Hunyo 2020.
Ning mao nga gidaghanon, 298 na ang nagdagan dinhi.
Naglangkob kini sa 23 ka hybrid point-to-point buses, 250 ka modernized taxis, ug 25 ka e-jeepneys nga dunay solar panels.
Ang 25 ka e-jeepneys nga solar powered nagdagan na sa Dakbayan sa Lapu-Lapu ug Cordova.
Ang ilang rota magtuyoktuyok lang sa Lapu-Lapu City ug lungsod sa Cordova.
Ang 23 ka hybrid nga mga bus nagdagan na karon sa Dakbayan sa Sugbo.
Sa habagatan, nagbiyahe kini padung kini sa Sibonga samtang sa amihanan, nagbiyahe kini hangtod sa Dakbayan sa Danao.
Duna say nagbiyahe gikan sa Cebu City ngadto sa Lapu-Lapu City pabalik.
Ang 250 ka modernized nga mga taxi nga naa sa Sugbo nadugang sa labing minos 5,000 ka mga taxi unit nga nagdagan na dinhi.Ang dugang 212 moabot gikan karon hangtod sa Hunyo sunod tuig.
Ang modernong taxi dunay GPS tracker, dash cams, automatic fare collection system ug speed limiter.
Gipakita kini sa publiko atol sa Public Utility Vehicle Modernization Program (PUVMP) Simultaneous Nationwide Launch nga gipahigayon sa parking area sa SM City Cebu, Huwebes, Hulyo 11.
Sa Sugbo, anaa palang sa 298 ka PUV units ang nagdagan dinhi nga gihatagan og provisional authority (PA) sa Land Transportation Franchising and Regulatory Board (LTFRB) 7.
Samtang ang nahabiling 87 ka hybrid buses, 50 ka modern taxis, ug 75 ka e-jeep gikatakda nga moabot sa di pa ang full implementation niini sa Hunyo sunod tuig.
Ang kalihukan gitambungan sa drivers ug operators nga misuporta sa lakang sa gobyerno sa paghimong moderno sa pampublikong mga sakyanan.
Tinguha sa national government ang pag-modernize sa PUV nga maghatag og kaayuhan sa mga drivers ug operators ug kahamugaway sa mga sumasakay.
“Sa mga high quality buses from Cebu City to Sibonga, from Cebu to Lapu-Lapu City ug from Cebu City to Danao. Dayon kining atong solar jeepney mao ni ang didto sa Lapu-Lapu. Upat ni ka rota: Lapu-Lapu-Cordova, Cordova to Lapu-Lapu. Kuan ni siya clockwise ug counter clockwise ana nga lugar. Then kanang atong Euro4 nga mga PUJ mao na makita ninyo karon diri 40 units naa sa downtown sa Cebu, Ayala, I.T Park, Duterte Avenue ug Robinsons, mao na sila’y mga biyahe”, matod ni LTFRB 7 Regional Director Col. Eduardo Montealto Jr.
Dugang sa direktor nga dili ma-phase out ang 11,000 ka mga public utility jeepney’s (PUJs) apan i-modernize lang kini.Aduna’y 34,000 ka mga PUV units ang tibuok Central Visayas base na usab sa natala sa LTFRB 7.
Kon mosakay ka sa e-jeep nga nagdagan na karon sa Lapu-Lapu, anaa kini electric fans, charging ports, wifi nga powered by solar panels ug pwede makapasakay og 24 ka mga tawo.