WALA-TOO nga batikos diha sa social media ang nakuha sa usa ka uyoan nga miunay og lugos sa iyang 5-anyos nga pag-umangkon kon ang grabe ka gisi sa bilahan maoy hinungdan sa kamatayon niini diha sa Valencia City, Bukidnon.
Dihang gipost sa SunStar Superbalita ang suspek sa Facebook page diin ning pagsulat sa balita, moabot na ngadto sa 4.3K shares, 3.3K comments kon asa sagad pulos nagtunglo, nagmaldisyon, nagbatikos, dako kaayo ang pagpaabot sa kasuko kang Mike Tinoy, residente sa dapit.
Si Police Lieutenant Colonel Surki Sereñas nibutyag sa SunStar Superbalita Cagayan de Oro nga nasabtan niya ang mga kasuko sa katawhan diha sa social media, labina nga ngilngig gyod ang gihimo niini ngadto sa iyang kaugalingon nga pag-umangkon.
"Ang balaod maoy magsilot niya, dili ang bisan kinsa," matud ni Sereñas, kinsa aminadong unang higayon kini niya natagbo nga klase sa insidente.
Mihatag sab kini og update kalabot sa suspek nga karon napasakaan na og kasong rape with homicide ngadto sa korte.
Imbes dalahon na unta si Tinoy didto sa prisuhan, mireklamo kining sukad pa niadtong adlawng Miyerkules dili kini paka-ihi, hinungdan gidala karon sa balay tambalanan ug giobserbahan sa mga doktor.
Gisuta pa sa mga doktor kung unsay hinungdan nganong dili na kini paka-ihi karon panahona.
Nasayran sab nga ang pamilya ug ginikanan sa mga biktima dako og pagbasol sa nahitabo ug dili madawat ang kamatayon sa ilang anak.