GIDUSO sa tsirman sa urban and rural poor and housing development nga patas-an ang equity alang sa mga urban poor aron nga matabangan nga makaangkon og balay ug yuta ang liboan ka walay panimalay o mga informal settlers sa siyudad sa Cagayan de Oro.
Gibutyag ni Atty. Edgar Cabanlas, tsirman sa maong komitiba, nga kini aron makatabang sa urban poor nga hingpit na nga makaangkon og balay ug yuta.
"Downpayment sa mga yuta nga gipuy-an sa mga tao, on site relocation, naa na may 10 percent. We will increase to 20 percent para makatabang gyud, mapalit nila ang yuta but there will be conditions," matud ni Cabanlas.
Usa sa mga kondisyon nga ang urban poor organization kinahanglan nga awtorisado sa siyudad ug dili mosupak kung ugaling dunay kinahanglanon ilabi na aron ma-akomodar ang mga dalan ug uban pang pasilidad sama sa fire trucks kung dunay emerhensiya sama usab sa sunog ug kinahanglan usab nga dunay lig-on nga home owner's association nga andam mopailalom og seminar ug masuta kung andam usab kining mobayad. Buot usab niini nga i-organisa pag-usab ang urban poor.
Nagtoo kini nga dako na kini nga tabang sa mga katawhan nga nagkinahanglan og panimalay, hinungdan nga giduso kini sa konseho ug buot himuon nga ordinansa.
Nasayran nga kini ang saad ni Cabanlas kaniadto panahon sa kampanya nga buot hatagan og katumanan.