Sakyanan nalimbuwad sa Cebu South Coastal Road

DOSE ka mga construction worker ang nakalingkawas human malimbuwad ang gisakyan sa Cebu South Coastal Road, Dakbayan sa Sugbo, Biyernes sa buntag, Hulyo 12, 2019.

Matud sa driver, Jerry Alicamin, 24, gikan sila sa Dakbayan sa Talisay ug padulong sa ilang trabahoan sa Dakbayan sa Lapu-Lapu. Mga trabahante sila sa Optimus Typographics.

Giingong kalit lang nga miungot ang ligid sa gimanehong nga Isuzu Elf nga ang plate number mao ang AZZ 5310.

Matud ni Alicamin nga gisuwayan pa niya paglubag sa manobela sa sakyanan aron malikay sila sa pagkabangga sa ubang sakyanan apan wa na niya makontrolar, hinungdan sa pagkalimbuwad sa maong sakyanan.

Nakaangkon og samad sa ulo ug ubang bahin sa lawas ang mga construction workers.

Dali hinuon nga gipa-tow sa mga traffic personnel sa dakbayan ang maong sakyanan aron dili makabara sa trapiko. (SunStar Cebu)