Westbrook mipahawa sa Oklahoma

MAG-uban og balik ang duha ka makapaukyab nga mga magduduwa nga sila si Russell Westbrook ug James Harden sa sunod nga season sa National Basketball Association (NBA).

Matod sa usa ka kasaligang tinubdan, kinsa dili gustong magpaila gumikan kay wala pa’y opisyal nga pag-anunsyo ning maong dakong kalambuan, gibuhian sa Oklahoma City Thunder si Westbrook aron ibaylo kang Chris Paul, kinsa maoy katambayayong ni Harden sa Houston Rockets.

Isip pakapin, makakuha sab ang Thunder og first-round picks sa 2024 ug 2026 ang katungod nga makigbaylo og first rounders sa laing duha ka seasons.

Si Paul usa ka nine-time All-Star samtang si Westbrook kay eight-time All-Star.

Ang duha ka mga magduduwa parehong naggunit og rekord sa NBA.

Si Paul nakarehistro na og 9,181 career assists, labing daghan nga nahimo sa usa ka aktibong magduduwa.

Si Westbrook adunay 138 triple-doubles diin nakatabla siya ni Magic Johnson ug nagsunod ni Oscar Robertson, kinsa adunay 181 ka triple-doubles.

Una nakakulit og dakong pangalan si Harden sa Rockets, siya maoy labing sinaligang Sixth Man sa Thunder kaniadto.

Ang Rockets aduna na karon duha ka kanhi MVP sa ilang kiliran. Si Westbrook nahimong MVP niadtong 2017 unya naangkon ni Harden kining maong pasidungog pagkasunod tuig.

Ang duha ka mga magduduwa pareho sab nahimong scoring champions. Si Harden nakatigom na og 11,958 ka mga puntos samtang si Westbrook adunay 10,025 ka mga puntos.

Dihang nag-uban pa sila sa Oklahoma City, naagak nila ni Harden ug Westbrook ang Thunder sa finals niadtong 2012 diin niadtong higayuna, ilaha pang gikauban ang laing dekalidad nga magduduwa nga si Kevin Durant.

Hinuon gipilde sila sa grupo nila ni LeBron James, Dywane Wade ug Chris Bosh sa Miami Heat niadtong higayuna.

Human niini, nitapon si Harden sa Rockets diin nahimo na siyang maoy labing sinaligan.

Si Westbrook maoy ikaduhang All-Star nga gibuhian sa Thunder ning maong post-season sunod ni Paul George, kinsa nabalhin na karon sa Los Angeles Clippers kauban ang kasamtangang Finals MVP nga si Kawhi Leonard.

Ang pagkabalhin ni George maoy gituohang hinungdan nga nakadesisyon si Westrbook nga mangita na sab og laing kampo.

Sa lakang nga ilang gibuhat, ang Thunder nakapundo na og walo ka 1st round picks nga puwede nilang mapahimuslan sa ugma damlag.

Ning maong post-season, ubay-ubay nga dekalidad nga mga magduduwa ang nabalhin sa laing kampo.

“Craziest NBA summer by far,” tweet pa sa beteranong NBA guard nga si Jamal Crawford. (AP, ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph