NAG-atubang karon og dakong problema ang representative sa party list nga Ang Probinsiyano nga si Alfred delos Santos tungod sa iyang pagsumbag sa usa ka waiter sa restaurant didto sa Legazpi City.
Kini nahitabo niadtong Hulyo 7 sa alas 3:40 sa kaadlawon ug nakakuha sa atensiyon sa publiko sa dihang nag-viral ang CCTV footage sa social media. Giuwan og negatibong komento si delos Santos gikan sa mga nitezens.
Si delos Santos kinsa gikatakda nga moasumir sa iyang puwesto sa 18th Congress karong Hulyo 22 mag-atubang og kasong administratiba ug kriminal kay mokiha man ang waiter nga si Christian Kent Alejo.
Posibli usab nga suspensuhon o taktakon siya sa iyang grupo sa Ang Probinsiyano kinsa hugot nga mikondinar sa iyang binuhatan.
Makita sa video nga si delos Santos kinsa may tulo ka kuyog niadtong higayona nga naglingkod sulod sa restaurant, kalit nga mibarog ug misumbag ni Alejo sa way igong rason.
Saysay ni Alejo nga sa wa pa ang hitabo, gitawag siya ni delos Santos ug sa pagduol niya niini, didto kalit gisukmag ang iyang nawong.
Matod ni Alejo nga gialegahan kuno siya nga hait siya og tinan-awan ngadto sa kongresista, butang nga iyang gihamakak.
Pastilan, mora pa man og na-hang over pa si delos Santos sa iyang kadaugan. Wa pa gani opisyal nga makalingkod sa kongreso, mora og nisiwil na ang pagka-abusado.
Matod pa nga nakigkita si delos Santos ni Alejo ug nangayo og pasaylo, pero mora man og porsigido nga mopasaka ang waiter ilabi na kay gisakyan og taga laing kampo.
Pero bisan pa siguro og mapasaylo siya ni Alejo, ang iyang gibuhat igo na nga makahulagway kaniya kon unsa siyang klase pagka-magbabalaod.
Wa usab kini mohaom sa pangalan sa iyang girepresentahan, Ang Probinsiyano.