NASUTA nga nag-atubang og kasong pagpatay kadtong biktima nga gipusil-patay sa Mantawe Drive, Barangay Tipolo, Dakbayan sa Mandaue niadtong Huwebes, Hulyo 11.
Usa sa anggulo nga gisusi sa kapulisan kalabot sa kamatayon ni Teodoro Mejares, pintor nga taga-Barangay Casili, Lungsod sa Consolacion mao ang personal nga bangi
Matod pa ni P/Lt. Adam Mantalaba, Police Station 2 - Mandaue City Police Office nga kasamtangang uncooperative ang kabanay sa namatay.
”Nagpadayon pa sab ang among gipahigayon nga investigation niya, posible nga angle nga among gitan-aw ani posible kining sa yuta or personal grudge niya kay basin naa ni siyay mga kontra ba,” asoy ni Mantalaba.
Apan sa pakisusi sa Super Balita Cebu sa Consolacion Police station nga base sa ilang database nga nasikop niadtong Agusto 13, 2016 si Mejares sa kasong illegal drugs apan nakapiyansa.
Nasayran nga nalutsan usab siya ug warrant of arrest sa kasong murder nga gi-isyu ni Judge Joe Noel Lawas niadtong Hunyo 6, 2019.
Sa pasiunang imbestigasyon sa kapulisan, giingong gikan usab nag-attend ug hearing si Mejares sa kasong illegal possession of firearms and ammunition sa Mandaue City Hall of Justice sa wala pa kini gipusil patay.
Nasuta sab nga ang girehistro nga pangalan sa record sa kapulisan mao ang iyang alyas nga “Teddy” hinungdan nga dako nalang ang ilang kahibulong nga mitumaw ang pangalan nga Teodoro nga gitug-an sa asawa niini nga maoy tinuod niya nga pangan. (ANV)