Frasco napili nga presidente sa LMP

SA IYANG pagkapili isip labing unang babaye nga presidente sa kasaysayan sa League of Municipalities of the Philippines (LMP) Cebu Chapter, positibo si Liloan Mayor Christina Frasco nga mas modaghan pa ang mga lungsod nga makatuman sa Seal of Good Local Governance pinaagi sa pakigtambayayong sa mga municipal local government operations officer.

Atol sa piniliay niadtong Biyernes, Hulyo 12, Casino Español de Cebu, naghiusa og botar ang 35 ka mga mayor sa kalungsuran nga diha niadtong tungora gikan sa kinatibuk-ang 44 ug way nakig-atbang ni Frasco isip bag-ong presidente sa LMP ug gihatagan kini og awtoridad sa pagpili sa kinsa ang molangkob sa bag-ong set sa opisyal sa liga.

Ang iyang gipili pulos niya mga kaalyado sa pulitika nga sila si Balamban Mayor Alex Binghay, vice president ofr external; Barili Mayor Marlon Garcia, vice president for internal; San Fernando Mayor Lakambini Reluya isip subling napili pagka secretary; Daanbantayan Mayor Sun Shimura, treasurer; Cordova Mayor Mary Therese Sitoy-Cho, subling napili nga auditor; ug Pinamungajan Mayor Glenn Baricuatro, press relations officer (PRO).

Samtang nagpili si Frasco og tagsatagsa ka representante sa matag distrito ang mga miyembro sa board of directors aron patas ang distribusyon. Kini mao sila si Sibonga Mayor Lionel Bacaltos (1st District), Argao Mayor Allan Sesaldo (2nd District), Aloguinsan Mayor Ignatius Caesare Moreno (3rd District), Medellin Mayor Joven Mondigo, Jr. (4th District), Borbon Mayor Noel Dotillos (5th District), Consolacion Mayor Joannes Alegado (6th District), Malabuyoc Mayor Lito Creus (7th District) ug San Remigio Mayor Mariano Martinez, ikawalo ug kanhi treasurer sa liga.

Sa iyang pamunoan, matod ni Frasco, iyang dad-on ang LMP sa digital age pinaagi sa pagpaila sa innovations sa information technology pinaagi sa ilang kaugalingon nga website ug application isip maoy tinubdan sa mga mayor subay sa mahinungdanon nga mga pangutana nga ilang giatubang sama sa resolutions sa Commission on Audit nga gipatuman alang nila.

Ubos usab sa iyang pagpangulo, iyang natan-aw nga dako og potential nga makatabang sa mga mayor isip potent source aron makahatag og gabay sa ilang tagsatagsa ka responsibilidad sama sa pagseguro sa edukasyon sa ilang mga konstituwente, maayo nga health care system ug social welfare system.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph