HELLO po! “Sa imong kasuko ayaw pagpakasala” ang gikanayon sa libro mga taga-Efeso 4:26. Usa kini sa mga nindot nga pagtulun-an nga gihagpat pod ni Joyce Meyer, usa ka inilang langyaw nga magwawali.
Sa pagkatinuod, nindot nga aduna kitay mapahungawan sa dihang nagbutobuto ang atong mga dughan. Liboan ang mga butang ug rason sa pagbatig kalagot.
Dali ra kaayo ta sungugon sa nagkadaiyang serkumstansya nga makapasurok sa dugo nato bah!
Bag-ohay pa lang, nasulod ko sa susamang sitwasyon nga lami gayud wayldan apan... grasya ni Lord, Iya ra dayon kong gipahuwasan.
Akong gibati nga dunay “wala namao” sa sitwasyon nga nahansakan nako apan sama sa giingon ni Meyer “ang kalagot kung dili makontrolar mamahimong hilo sa atong pangutok ug pagbati.”
Kita mismo ang magdisiplina sa atong mga kaugalingon aron dili kita mangadaut, igsuon. Daghan na bayag nagapatidpatid og lata sa kadalanan. Dili na nato sila dugangan.
Dili sala malagot APAN... ang atong reaksyon ug aksyon samtang anaa kita sa kalagot maoy delikado, igsuon kay bisan sa simpleng pulong, “makaguba kini sa kinabuhi nato o sa uban.
Ingon ni Meyer nga dili nato ilimod nga nalagot ta. Gani, atong sutaon ug angkunon ang atong mga pagbati apan dili kini tugutang mangugat sa atong mga kinabuhi.
Dili man sayong walaon ang pagbatig kasuko apan mamahimo kining gamiton sa Ginoo aron mahulma og tarung ang atong mga pagkatawo.
Mangaliya kitag tabang sa Kalangitan kay dili man nato tuod mapugnang ang atong mga pagbati apan magiyahan kita Niya sa hustong pagbehave o paggawi. AMEN.