MIDSAYAP, North Cotabato -- Patay ang usa ka ulitawo human nga giingong gipaak og irong buang.
Namatay mao si Renan Valsote, 24, molupyo sa Barangay Bual Norte sa nahisgutang lungsod alas 10 sa buntag, Huwebes, Hulyo 11.
Sumala sa mga paryente ni Valsote nga napaakan og irong buang ang biktima niadto pang Disyembre 2018.
Apan giingong wala na gidala ngadto sa tambalanan si Valsote sa iyang pamilya, inay gipatandok (quack doctor) na lang siya niadtong panahona gumikan lagi kay naglisud sa kuwarta.
Sa wa pa namatay ang biktima, giingong gikalintura siya, nagsuka-suka ug gibati og sobrang kasakit sa lawas hangtud migrabe ang iyang kondisyon sa panglawas.
Nakahukom ang pamilya nga dad-on na siya sa tambalanan Biyernes, Hulyo 12, apan namatay tungod matud pa mikatag na ang rabies sa iro sa iyang lawas. Kini sumala sa doktor nga nag-atiman kaniya nga wala panganli.
Gilubong gilayon ang biktima tungod sa tambag sa mga opisyal sa Department of Health (DOH) aron malikayan ang pagkaylap sa rabies sa iro.
Nagtambag sab ang DOH sa mga paryente ug sa tanan nga nakauban ni Valsote nga magpa-inject og anti-rabies vaccine sa mga ospital ug mga health center. (Edgar E. Fuerzas)