MOABOT sa P2.6 Million nga balor sa ilegal nga drugas ang nasakmit sa kapulisan sa Dakbayan sa Sugbo sulod lang sa pito ka oras nga anti-drug operation.
Alas 10:10 sa gabii Biyernes, Hulyo 12, 2019 sa Sitio Laguna, Barangay Bulacao, Dakbayan sa Sugbo unang nasikop sa mga sakop sa Pardo Police Station si Ray Anne Singkol Tisoy alyas Ann, 20, taga Hawod Compound, Barangay Bulacao.
Nakuha kang Tisoy ang usa ka pakete sa gituohang shabu sa dihang napalitan kini sa usa ka pulis nga nagpatuo nga kustomer.
Sa pagrekisa nasakmit ang laing lima ka dagkong putos nga motimbang ang tanan sa 250 grams nga mobalor sa P1.7 Million.
Matud ni Police Major Regino Maramag, hepe sa Pardo Police Station nga nangulo sa operasyon, na-monitor na nila si Tisoy usa ka buwan na ang nakalabay human masikop ang iyang uyab nga si Niño Parba Camacho nga naa karon sa Cebu City Jail.
Si Camacho nakuhaan og 100 grams nga mobalor sa P680,000 ug giila nga high-value target sa Bulacao police.
Si Tisoy na, matod pa, ang mipuli sa iyang uyab sa pagpamaligya sa ilegal nga drugas sa dihang nadakpan ang iyang hinigugma.
“Matapos mahuli ang uyab niya, na-monitor na namin itong si Ray Anne Tisoy. Inaalam pa namin kung saan galing ang suplay niya,” matud ni Maramag.
Pagkaalas 4:30 sa kaadlawon Sabado, Hulyo 13 nasikop usab sa buy-bust operation sa Labangon Police Station sa pagpangulo ni Police Major Henrix Bancoleta ang usa ka taxi driver ug mekaniko sa Dalan Salvador.
Ang mga nasikop mao silang Celso Tormis, 37, taxi driver ug Miguel Canoy, 30, mekaniko nga pulos taga lungsod sa Barili.
Nakuha kang Tormis ang pito ka pakete sa gituohang shabu samtang kang Canoy ang lima ka putos nga motimbang ang tanan sa 30 grams nga mobalor sa P204,000.
Milanat lang sa 30 minutos, duha ka habal-habal driver ug usa ka trisikad driver ang nangadakpan sa Labangon Police Station sa laing buy-bust operation sa Bayanihan Street, Barangay Quiot.
Ang mga nadakpan mao silang Wilfredo Allarse, 32, taga Sitio Fatima, Basak Pardo, Jonathan Baclayon, 42, taga Sitio Kamansi, Barngay Quiot, pulos habal-habal driver ug Eugene Añora, 25, trisikad driver nga taga Sugarland, Barangay Cansojong, Dakbayan sa Talisay.
Walo ka dagkong putos sa gituohang shabu ang nakuha sa kapulisan nga motimbang sa 110 grams nga mokantidad ang tanan sa P748,000.
Ang mga dinakpan gipaubos sa imbestigasyon kon asa sila magkuhaan sa ilang suplay sa ilegal nga drugas.
Ang bag-ong hepe sa Cebu City Police Office nga si Police Colonel Gemma Vinluan nagpasalamat sa iyang mga sakop nga padayon sa kampanya batok sa ilegal nga drugas.
Mando niya nga hutdon ang tanang mga drug personalities sa ilang hurisdiksyon aron sa umaabot nga mga adlaw makadeklara na sila og drug-free barangay sa Dakbayan sa Sugbo. (Superbalita Cebu)