MISAAD si Senator Bong Go nga iyang buhaton ang tanan niyang makaya aron makaduwa si National Basketball Association (NBA) star Jordan Clarkson sa Gilas Pilipinas alang sa 2019 FIBA Basketball World Cup nga sugdan karong Agusto 31 sa China.
Nagkanayon ang bag-ong napiling senador nga nakighimamat na siya sa mga opisyal sa Samahang Basketbol ng Pilipinas (SBP) aron ipadayag ang iyang kinatibuk-ang suporta sa pagkumbensir sa FIBA nga tugtan nga makaduwa si Clarkson isip usa ka lokal nga magduduwa sa Pilipinas.
“Nakausap ko ‘yung mga officials ng SBP and I told them, I am ready to do everything just for the Philippines to parade Jordan Clarkson in the coming Fiba World Cup,” matod ni Go sa interbyu sa Spin.ph.
“Sana makapaglaro si Clarkson. Ako ipaglalaban ko ‘yan, kung ano maitutulong ko para makapaglaro si Jordan, kasi pride para sa mga Pilipino ang makita ang Pinoy, na nasa NBA, na lumalaban para sa bandila natin.”
Si Go naila nga usa ka mahiligon sa duwang basketball ug kanunay kining makita nga motan-aw og personal sa mga duwa sa Philippine Basketball Association (NBA).
Ang SBP padayon pang naghuwat sa tubag sa FIBA kabahin sa ilang hangyo nga tugtan nga makaduwa sa Gilas Pilipinas ang usa sa mga pambato sa Cleveland Cavaliers.
Usa ka Pinay ang inahan ni Clarkson apan wala kini nagdako sa Pilipinas ug wala sab kini nakakuha og Philippine passport sa wala pa kini nag-16 anyos.
Sa patakaran sa FIBA, tugtan lang ang usa ka Fil-foreigner nga makaduwa sa Pilipinas isip usa ka lokal nga magduduwa kon nakakuha kini’g Philippine passport sa wala pa kini nag-16 anyos.
Gawas niini, dili sab bastabasta makalugnot si Clarkson sa iyang sitwasyon sa National Basketball Association (NBA) diin mopatong pa kini sa katapusang tuig sa iyang kontrata sa Cavaliers nga nagbalor og $50-million.
Si Go maoy nagsilbeng instrumento aron makaduwa si Clarkson sa Philippine team sa Asian Games sa miaging tuig.
Kabahin sa World Cup, nga lahi og patakaran kumpara sa Asian Games, nanghinaot si Go nga molampos sab siya sa iyang lakang nga gihimo ug pagahimuon pa aron makaduwa’g balik si Clarkson alang sa nasod.
“Mas mainam naman yung gumawa tayo ng hakbang kesa naman naghihintay tayo, tapos wala pala,” pasabot ni Go.
“Sabi ko sa team management ng Gilas, kung ano ang pwede kong maitulong, ibibigay ko yun para sa bansa natin.”
Nagtuo si Go kon naa si Clarkson unya idugang pa si naturalized player Andray Blatche, makakombati og insakto ang Gilas Pilipinas batok sa higanteng mga puwersa sa kalibutan. (ESL)