SAAN a makuntento. Saan a bilib. Adu pay ti kayata a mapasamak. Kayatda nga isuda ti agnaed idiay Malakanyang. In short...dida mapnek iti naaramidanen ti agdama nga administrasyon. He he...piman met ni lakay Digong. Agdadata ditan dagiti naaramidanna ngem saan gayam a kontento ti sumagmamano a kontra. Tsk tsk...no awan kano ti kontrabida iti maysa a pelikula...kurang ti ganas nga agbuya. Mas nanannanam kano ken nasaysayud ti istorya no saan laeng a bida ti adda.
Masapul tay nalaing a kontrabida tapno umimas ti suspense ken tumibker ti talek ken raem para kenni bida. He he...medyo mayat sa a ratsada dayta, kabsat. Ngem no iti agdama...sus maryusep...kasla nagadun sa metten dagiti kontrabida. Ala, intayto sukayen a naimbag ti nakuna a kontrobersiya ngem sakbayna, intay pay man bisitaen dagiti sumangka-kontrobersiya met nga is-isyu iti naglabas:
***
Iti isyu pay ti speakership ti intay unaen a lagipen appomi. No mano a nagan ti naibudi iti eksena. Ngem nagsentro iti tallo – Cayetano, Velasco, Romualdez. Ngem adda met dagiti naindorso a pagpilian. Ngem ania’t napasamak? Inyerdorson a kas pinal ni Pres. Duterte ni Cayetano kas umuna nga speaker iti uneg ti kinse a bulan a sarnuen ni Velasco para iti 21 a bulan. Naindorso met a kas Majority leader ni Romualdez. Saludsod? Pinal kadi daytan apo?
Isuda kadin ti umno ken maiparbeng nga agtugaw? Isuda kadi ket pinili wenno binotosan dagiti mammanday-linteg ti Kamara wenno Lower House? Ti sungbat: saan.
So...kayatna a sawen a rumbeng nga agbobotos pay dagiti kongresista ket no sinno ti kayatda nga ipatugaw, isu ti masurot. Hmmm...kasanon no ti mapilida ket saan a ti napili ni Pres. Duterte? Kuna ti maysa a legal a luminaryo...ti masurot ket ti pagayatan ti ad-adu wenno mayorna iti Lower House. Tsk tsk...kasla adda masirsiriptayo, pards.
Kayatna kadi a sawen a saan pay nga agkampanti ni Cayetano iti naibaga a puwestona? Anianto ngata met dagiti eksena a rumsua no saan nga isu ti mapili? Ti mayorya kadi ti Kamara ti masurot wenno ti indorsement ni Duterte? Ama aya...adu pay gayam a parikut ti lasatentayo sakbay nga agsubli iti sigud a puwestona dagiti narsaak ken natnag a kiday kada kurimatmat. Maudi a saludsod: pudno kadi nga adda nagiwaras wenno naglagay a kandidato? Mano ken siasino? Mabalin kadi a maammuan ken no sinno met dagiti napulagidan iti lugit, este, takuar?
***
Pannakaipurruak ni sigud a D.A Secretary Pinol idiay Mindanao...nia’t makunayo? Adda kadi masay-upyo a bungtot wenno bangsit? He he...ngamin sakbay iti transferna...adu dagiti kontrobersiya kas koma iti kaudian a lamma ti inaramidna ket ti negosasyonna kadagiti 22 a mangngalap a biktima ti dungpar nga aramid ti barko ti Tsina. Simmaruno dita ti nagdadaluson a benepisyo dagiti biktima manipud gobyerno.
Banag a nangibunga iti apal manipud kadagiti grupo dagiti mangngalap a naikarian iti benepisyo ngem awan met naawatda agpapan ita. Dayta ti banag no apay a kasla nagtubo nga uong ken nagbusi a mais dagiti protesta saan laeng a kontra D.A. no di ketdi ultimo a ni Pres. Duterte, nairamramanen. Tsk tsk...kuna ti maysa nga analista: kasta a talaga ti biag...no adda nakitam a mabalin a luganan tapno mayam-ammom ti bagim ken gannuatmo...tapugam tapno makaalaka iti simpatya ken suporta. He he..nabayagen a panawen ti kasta a paspasamak ditoy pagilian.
Agaammotayon, pards. Ti sakiten ti nakem...adu dagiti paar-aramat. Iti sangkabassit a maipadakulap a papetpet kano ken suporta, aramidendan ti aniaman a dikta uray illegal. Dayta ti gapuna no apay nga uray no sinno ti patugawem dita Malakanyang, uramenda latta ti rupana iti plaza a pagsintruan ti dir-ida tapno bumaba iti puwesto ti nakatugaw.
Awan ti presidente ti saan a naprotesta, kaadduan kadakuada ket nakudeta. Ta apay? He he...saantayo a kuntento ta kayattayo a datayo ti agtugaw iti tugawda. Arasaan ngarud daydi lolok: apal a bakes este, dakes dayta. Idi kano pay laeng panawen dagiti kastila ken katipuneros...kastan ti mapaspasamak. Agpipinnatayda gapu iti apal a dakes. Tsk tsk...imbag laketdin ta saan a nagbalin a katipunero daydi lolok no di ketdi...KUMAKAPON!
***
Umadanin ti SONA ni Pres. Duterte. Ibinsabinsana manen ti nagappuananna iti naglabas a tallo a tawen ken dagiti planona pay nga aramiden iti maudi a tallo a tawenna iti takem. Ngem ita pay laeng, iti laksid iti pannakaammo ti sosyodad nga adu met dagiti naaramidanna maibase kagiti naikarina nga aramiden idi sakbay ti eleksiyon. Kas koma iti addang kontra illegal a droga ken korapsiyon. Nannanamentayo itan dagita a produkto ti Karina. Nupay saan pay kano a pakaragsakan ti addangna kontra ENDO wenno kontraktualisasyon. Adu pay kano a kompanya wenno patrabaho ti saan pay a nagtulnog iti sagudayen ti naputar a linteg ken annuroten.
Sabagay...napaut pay ti tallo a tawen a panagtakemna ni Digong. Husgaantayto kalpasanna no dina maipatungpal ti karina nangruna iti ENDO ken pannakaingato ti suweldo dagiti dadduma pay a taga-gobyerno a saan laeng nga iti kapulisan ken armada ti pagilian. Adu ti agkunkuna ano maikkan laeng iti umno a pagsammakedan a paglintegan (power) kabaelan kano ni Digong a solbaren ti parikut iti grabe a trapik dita NCR.
Pagaammotay metten a saan a bumasbassit ti papulasyon no di ketdi manaynayonan. Natural laeng nga agnayon met iti lugan kadagiti kalsada. Uray pay kadagiti dadduma a disso iti ruar ti NCR, nakaro metten ti parikutda iti congestion wenno traffic problems. Malagipko manen daydi lolok: idi kano panawenda, awan ti trapik ta nuang ken baka laeng ti aramatda. Ngem idi dimteng dagiti kuliglig ken traktora...addan trapik. Kayatna a sawen, sumursurot ken gumidgiddan dagiti parikut iti panagdur-as ti biag babaen iti siyensiya ken teknolohiya.
***
Intayon sublian ti tema daytoy nga isyu: Nakaam-amak a marubruban ti templa ti utek ken panagtimbang ni Pres. Duterte. Ammotayon ti temparamentena wenno ti kinataona. Pudno a narigat nga ugasan ti dila ken utekna. No imbagana...imbagana. Uray adu ti masaktan ken di makaawat. Ngem rumbeng koma met a matimbang a para iti kaadduan ti ar-aramidenna. Nga iti likud dagiti adu a basnot ken uyaw kada pammabalaw iti kinataona...itultuloyna latta ti no ania ti ammona a para iti kaadduan.
Kunada ngarud: dayta ti narigat kadatayo iti agdama...ammotayo langaruden a para iti kaaduan ti gannuat, kayattayo pay laeng ti lumisi wenno sumiasi iti umno a desdes. Iti karirikna ti dadduma, isuda laeng ti nalinteg ken nalaing. Ti karugitan iti amin nga aramid ket ti ugali a panagimbubukod...ken awanan talek iti aramid ti sabali. Ngem sapay koma ta dinto paging ni Digong kadagita. Iringpasna koma ti maudi a tallo a tawen iti akemna para iti natibtibker a masakbayan ti pulitayo.
Ti nakaam-ames ket ti panawen nga awanton ni Digong iti poder. Anianto ngatan ti mapasamak? Agsublitayo ngata iti kas iti kasisigud? Adios mia mor, ciao, mabalos!