SUL-OB ang puti nga sinina, hinay ug naglisod og naug sa hagdanan si Pinky Velasco nga nagsige og hilak samtang giagak sa iyang bana nga si Gregorio “Greg” Velasco Jr. ug sa iyang inahan nga si Josephine, 67.
Samtang sila nanganaug sa hagdanan, gitukar usab ang kanta nga “Beautiful in White” sa Irish singer nga si Shane Filan.
Ang mga tawo nga diha sa ubos sud sa ilang balay, naghilak nga nagtan-aw nila.
Pangandoy sa 35 anyos nga ginang nga molakaw sa aisle sa simbahan paingon sa altar apan tungod kay luya na siya, sila gikasal sud sa ilang panimalay sa Barangay Mambaling, siyudad sa Sugbo.
“Dugay na gyud ko nag-pray nga makasal nami ni Greg. Nangita gyud og way ang Ginuo nga matubag ang akong pag-ampo. Dugay nako gusto mopaso sa church,” paambit niini.
Si Padre Mhar Vincent Balili, kura paroko sa Archdiocesan Shrine of San Roque sa Mambaling, nipasabot nga tungod sa pastoral grave reason, nitugot sila nga sud sa balay himuon ang sakramento sa kasal, apan kinahanglan solemne, gumikan kay di maglisod na og lakaw si Pinky, gumikan sa iyang sakit nga ovarian cancer.
Sa misa, si Balili nagpugong sa iyang mga luha samtang nagmisa gumikan kay nakita niya ang tinuoray nga gugma nila ni Greg ug Pinky sa usa’g-usa ug ang ilang hugot nga pagtuo sa Ginuo taliwa sa dakong pagsuway nga ilang giatubang karon.
“It was an expression of deep faith nga panahon sa kalisod, kinahanglan naay Ginuo, labi na sa mga couple. Ang kaminyuon man gud mo-survive lang in a very long period of time until death kon naay bendisyon sa Ginuo,” matod ni Balili dihang nahinabi sa Superbalita Cebu.
Sa 15 ka tuig niya nga pagkapari, sa unang higayon karon pa nahitabo nga unom ka mga sakramento ang iyang nahatag sa usa ka okasyon lang nga iyang gihulagway nga labing talagsaon ug labing memorable.
Alas 4:30 sa hapon niadtong Biyernes, Hulyo 12, nadawat sa magtiayong Velasco ang unom ka mga sakramento sa bunyag, kompirmasyon, kasal, eukaristiya, hilog sa masakiton, ug kumpisal.
Si Padre Aldrin John Baran, assistant parish priest ni Balili, unang nipakumpisal ni Pinky sud sa lawak sa ikaduhang andana sa wala pa magsugod ang misa.
Sa misa human sa wali ni Balili, gisunod ang bunyag ni Greg ni Rev. Neil Cortes, ang deacon nga bag-ong naordinahan niadtong Martes, Hulyo 9 ug ang confirmation sa magtiayon, sunod ang seremonyas sa kasal. Sa dayong human sa misa, gihilogan si Pinky ug gitapos ang misa sa pag-ampo kang Bishop Teofilo Camomot.
Atol sa communion, nangluspad si Pinky nga naglingkod sa bangko sa tibuok misa tupad ni Greg ug maklaro sa iyang nawong ang kasakit nga gibati.
Naghungitay pa og cake si Greg ug Pinky sa wala pa mosaka balik sa lawak ang ginang.
“Nalipay gyud ang tanan ba, they felt the presence of the Lord. Nalipay sila kay it was a dream come true for the couple ug nakita ang support sa community,” dugang ni Balili.
Nagsugod ang love story sa duha sa University of San Jose-Recoletos niadtong 2001 diin si Greg nga usa ka computer laboratory assistant ug nagtungha sa kursong Computer Science na-love at first sight ni Pinky nga tinun-an sa Commerce major in Management.
Niadtong Agusto 8, 2006, nakasal sila sa huwes ug dunay duha ka mga anak: sila si Harriet Brea, 12, ug Humphrey, 10.
Niadtong Hunyo 26, 2019 lang, nahibaw-an ni Greg nga may stage four cancer sa ovary si Pinky dihang gioperahan sa St. Vincent General Hospital, siyudad sa Sugbo, diin gitangtang ang duha ka ovary, appendix ug matris niini, gumikan sa duha ka dagkong mga bukol.
“Kato nga time nag-ampo gyud ko sa Ginuo. Among gisalig ang tanan sa Ginuo. Walay imposible sa Ginuo. He will make a way. Para sa amoa pagsubok ra gyud ni,” pamulong sa 38 anyos nga bana nga puno sa paglaom. (SCG)