SINGKO ang anyos nga lalake na-missing human mahulog sa box culvert sa Exoville, Barangay Pardo, Dakbayan sa Sugbo samtang naligo sa uwan ala 1 sa hapon sa Sabado, Hulyo 13.
Sa pagsuwat ning taho, padayon pa ang search and rescue operation sa mga sakop sa Cebu City Disaster Risk Reduction and Management Office.
Ang biktima nga giila nga si John Clark Ebowa naligo uban sa lain pa nga mga bata.
Samtang nalingaw sa pagkaligo sa ulan ug nagduwa uban sa iyang mga higala, kalit lang kini nga nahulog sa culvert ug wa na igkita.Dali nga nagpatabang ang mga residente sa lugar sa barangay.
Nanawag dayon kini sa mga rescue team sa Kagamhanan sa Siyudad sa Sugbo.
Matod ni Cebu City Councilor Dave Tumulak nga dako ang box culvert nga adunay sukod nga 4 by 40 meters nga milagbas paingon sa sapa sa Tagunol nga niadtong tungora kusog kaayo ang bul-og sa tubig tungod sa kakusog sa ulan.
Gipangbakbak na sa mga rescue worker ang simento sa culvert diin nakit-an na ang tsinelas nga gituohan nga iyaha sa biktima.
“Padayon pa karon ang search and rescue sa atong mga tinugyanan sa city disaster. Nag duwa-duwa man gud ni sa ulan ning bataa nya kalit lang nabulasot sa lungag,” matod ni Tumulak.
Tambag niya sa mga ginikanan nga kon mobunok ang kusog nga uwan, di nila tugtan ang ilang mga anak nga maligo aron kalikayan ang disgrasya. / (AYB)