HIMUON nga national museum ang 109 anyos nga Malacañang sa Sugbo human nitugot ang Office of the President ug ang Department of Finance, sumala ni Presidential Assistant to the Visayas Secretary Michael Dino.
Si Dino nibutyag nga nitugot si Executive Secretary Salvador Medialdea ug Finance Secretary Carlos Dominguez III nga himuon nga laing tourist attraction sa Sugbo ug Visayas ang wala na gigamit nga Malacañang sa Sugbo. Kini dihang sila nagkaestoryahanay sila atol sa cabinet meeting didto sa kaulohan niadtong Hulyo 1, 2019.
Si kanhi house speaker Gloria Arroyo nigamit sa edipisyo nga kanhi buhatan ug gipanag-iya sa Bureau of Customs isip iyang extension office sa dihang siya presidente niadtong 2004 ug gitawag kini nga Malacañang sa Sugbo. Dinhi siya mag-opisina sa matag anhi niya sa Sugbo.
Si kanhi presidente Benigno Aquino III ug Presidente Rodrigo Duterte wala mogamit sa building.
Niadtong Oktubre 15, 2013, nakaangkon kini og kadaot human sa kusog nga linog nga niigo sa Sugbo ug Bohol. Wala kini mapaayo.
Sa suwat ni Evangelina Lourdes Arroyo-Bernas, chairperson sa National Museum, ngadto kang Dino, kini nipahibawo nga interesado ang NM nga himuon kini nila nga regional museum sa Central Visayas pinaagi sa restoration. Subay kini sa ika-500 ka tuig nga pag-abot ni Ferdinand Magellan ug sa pagsugod sa Kristiyanismo sa Pilipinas nga saulogon sa 2021.
“This will complete the necessary nexus and linkages between the existing NM branch museum in Tagbilaran City, Bohol, and the forthcoming branch museum in Dumaguete (gipaabot mahuman karong 2019 ug inagurahan sa 2020),” sigon ni Bernas, anak ni Arroyo, sa iyang suwat pinetsahan og Hunyo 28, 2019.
Matod ni Bernas, ang estruktura ug ang dapit sa Malacañang sa Sugbo kanunay gikonsiderar sa NM nga ideal tungod sa lokasyon niini nga naa sa makasaysayanon nga lugar sa kinapusuran sa siyudad sa Sugbo, duol sa Fort San Pedro ug Plaza Independencia. Kining duha ka mga atraksyon gideklarar nga National Cultural Treasure. (SCG)