MOIMBESTIGAR ang United Nations Human Rights Council sa mga pagpatay dinhi sa nasod nga may kalambigitan sa illegal drugs. Gidudahan man gud nga ang tanang pagpatay nga may kalambigitan sa illegal drugs, gipaluyohan sa kagamhanan.
Gisamotan pa ni sa mga pamahayag sa publiko ni Presidente Rodrigo Duterte nga way lipodlipod sa pagpabor sa patay niadtong high profile nga mga drug personality. Tinud-anay sab kaha nga ang kagamhanan ang nagpaluyo sa mga pagpatay nga may kalambigitan sa illegal drugs?
Di usab tingali kay sukad kaniadto, naa na ang pinatyanay sa mga durugista, labina niadtong nag-away sa teritoryo ug nag-onsehan. Di lang ni sa salida sa sine makita, kon di sa tinud-anay nga mga sitwasyon. Mao bitaw nga kada grupo dunay mga gunman o gun-for-hire kay maoy ilang trabaho ang paghipos sa mga kaaway ug nagtraydor.
Apan di makabasol ang kagamhanan nga motumaw kining pagduda tungod sa kapakyas sa kapulisan sa paglusad og seryusong mga imbestigasyon sa high-profile nga mga pagpatay sa gidudahan nga mga drug lord ug kadtong gidudahang ilang protectors nga naa sa poder sa kagamhanan.
Sa Sugbo lang, pila man ka high-profile killing ang wa masulbad? Mahimong ehemplo niini ang pagpatay kanila ni Ronda Mayor Mariano Blanco III ug kang Asst. Prosecutor Mary Ann Castro. Niungot ang imbestigasyon sa mao nga mga kaso. Wa silay suspek nga matumbok. Wa usay makita nga kalamboan sa imbestigasyon, kana kon giimbestigar lagi.
Kini nga mga rason maoy nakaingon nga mosantop sa huna-huna sa tawo nga ang kagamhanan ra usab ang nagpaluyo ning mga pagpatay karon. Kon nakapakita pa ang mga awtoridad og kalamboan sa ilang imbestigasyon, di kini mosangko sa pagduda.
Bisan tuod di tanang patay iya sa kagamhanan, apan kon duna pa lay imbestigasyon nga klaro, di tingali mosangko ning sitwasyon karon.