NGANONG magsigi man og buhi kini si Senate President Tito Sotto og mga pulong nga molutaw hinuon ang iyang pagka ignorante kabahin sa isyu?
Bag-o lang siya gisaway adtong iyang gisulti nga ang mga isda nga di ta masiguro kon asa gikan ang mga isda nga naa sa West Philippine Sea. Naa man daw sa ilawom sa dagat.
Dihang gisugat siya og grabing mga pagsaway, igo na lang niingon ang senador nga igo ra siya nagkomedya.
Karon, nitingog na sab siya sa isyu kabahin sa resolusyon sa United Nations Human Rights Council (UNHRC) nga nangitag komprehensibong taho kabahin sa kahimtang sa tawhanong katungod sa Pilipinas.
Napasar ang maong resolusyon sa ika-41 nga regular session sa UNHRC didto sa Geneva, Switzerland. Ang Iceland maoy nisang-at sa maong resolusyon nga giuyonan sa 18 ka mga nasud kasagaran naa sa Uropa. Moabot sa 14 lakip ang China ang nibotar batok sa resolusyon samtang 15 ang ni-abstain.
Imbes hisgutan ang mga punto sa resolusyon ug nganong supak siya niini, iya hinuong gisaway ang mga nasud nga nisugot sa aborsyon.
Sa dili pa ang United Nations, and Estados Unidos, ug ubang mga western countries moimbestigar sa giingong extra-judicial killing kun EJK sa Pilipinas, angay kuno nga sulti-an ta pila ka mga bata nga wala matawo kay gi-abort kun gipakuha sa sabakan, nagkanayon ang Sotto.
Wa ba kuno kiniy mga katungod? Wala silay ‘moral high ground,’ matod pa ni Sotto.
Sa wa pa unta motingog ang atong Senate President, nag-research unta kini siya aron di moguwa nga yabag.
Nasipyat na gud kining komedyante sa Eat Bulaga sa iyang komentaryo kabahin sa mga isda sa West Philippine Sea.
Nasayran nga ang mga 18 ka nasud nga namotar pabor sa resolusyon mao ang Argentina, Austria, Australia, Bahamas, Bulgaria, Croatia, Czech Republic, Denmark, Fiji, Iceland, Italy, Peru, Mexico, Slovakia, Spain, Ukraine, United Kingdom lakip ang Northern Ireland, ug Uruguay.
Ang US wa na may labot sa UNHRC human kini ni-withdraw sa miaging tuig. Dayon ang aborsyon dili legal sa Bahamas, Peru, Mexico, pipila ka dapit Australia.
Karon, unsa man say moral high ground sa usa ka taas nga opisyal nga nagpataka lang og yawit. Taas nga opisyal kini si Sotto kay kon simbako di na makatuman sa ilang katungdanan si Presidente Rodrigo R. Duterte ug Bise Presidente Leni Robredo, ang Senate President man ang molingkod.
Dayon, dako kaayo ang kalainan sa isyung EJK kon ang pasangil nga daghan na kaayo ang nangamatay sa war on drugs ni presidente ug kining aborsyon. @anol_cebu sa Twitter