SA MIAGING tuig, ang presidente sa Motorcyle Philippines Federation niingon nga sa ilang gipahigayon nga traffic rules exam sa nakalabay nga duha ka mga tuig, pito ra ang nakapasar sa 9,000 nga nikuha. Ilang gihatag ang exams sa wa pa gihimo nila ang seminars alang sa road safety.
Grabe no, sa 9,000 pito ray nakapasar sa mga tigmotorsiklo. Bantog ra nga ang labing daghan og mga disgrasya sa kadalanan naglangkob sa motorsiklo. Daghan sa mga nagmotor wa makahibawo sa road safety kun mga buhatunon alang sa luwas nga pagmaneho sa karsada.
Kana lang pagmaneho nga dunay igong distansya sa kilid, atubangan ug luyo, apan ang mga nagmotorsiklo magsumpot na hinuon. Bisan magpadagan, makigtupad sa samang lane, di lang mosunod. Kuyaw kaayo nga magpingki ug mangalukapa na hinuon. Mao bitaw kon magmaneho ko sa scooter, mag-amping ko. Di kaayo ko kuyawan sa mga four-wheeled nga sakyanan, ari ko sa mga nagmotor ug nag-scooter.
Kining gibutyag sa MCPF applicable ni sa Cebu ug ubang mga dapit sa nasod. Daghan kaayo ang nagmotorsiklo, kasagaran mga habalhabal nga wa gani lisensya, basta kahibawo lang mopadagan og motorsiklo, namasahero na
SEMINAR
Maayo unta kon ang gatusan ka mga organisasyon sa habalhabal dinhi sa Cebu mopailawom sa road safety seminars. Importante kaayo ni aron maminusan ang mga disgrasya sa atong kadalanan nga naglambigit sa mga motorsiklo.
Nindot tingali kon makahibawo na ning mga habalhabal driver nga ang ilang pagpataka og park daplin sa kadalanan nakahatag og kakuyaw ug nakaapekto sa dagan sa trapiko. Kana lang sa may atbang sa JY Square sa Lahug, daghan ang mga motorsiklo nga mamasahero, anha magpahimutang sa may corner padung sa merkado sa Lahug. Kuyaw ni nila ug sa mga motorista, gawas nga naka contribute ni sa kahuot sa trapiko.
EARTH HOUR
Karong Marso 30, Sabado, ang Habagat, uban sa pipila ka mga grupo sa bikers, nagpasiugda og night ride sa mao nga adlaw. Isip bikers, amoa ning gisuportahan nga kalihukan kada tuig.
Ang assembly area mao ang Plaza Independencia. Ang registration magsugod sa alas 5 sa hapon. Niadtong ganahan og jersey isip souvenir, adto lang mo sa ilang mga outlet. Mas maayo usab nga manihapon daan, labina kon pamilya ang mangapil, aron di magutman.
Kining group ride mas luwas ni itandi sa grupo grupo lang nga sikad kay mas visible sa gabii. Among gidasig ang mangapil sa pagsul-ob og helmet ug pagbutang og blinkers sa inyong mga biseklita. Kini importante kaayo alang sa kaluwasan. Kita kita ta unya sa gabii sa Marso 30.