USA ka giilang drug queen ug laing tulo ang nasikop sa duha ka managlahing operasyon sa Dakbayan sa Talisay Sabado, Hulyo 13, 2019.
Gihulagway sa kapulisan sa Syudad sa Talisay nga drug queen sa syudad ug iyang alalay ang nasikop sa Drug Enforcement Unit (DEU) sa Talisay City Police Station sa gihimo nila nga buy bust operation sa usa ka pensione house sa dalan Mansueto, Barangay Tabunok, Dakbayan sa Talisay, alas 7:30 sa gabie, Sabado.
Ang mga dinakpan giila nga si Gloria Banquicio Morales alyas Inday, 45 anyos ug ang iyang alalay nga si Jeenel Sahol Cabañero, 18 anyos nga pulos nagpuyo sa Sitio Mananga, Barangay Tabunok.
Nakuha gikan sa mga dinakpan ang mga pakete sa gituohang shabu nga mobalor sa P82, 000.
Si Police Captain Nazarino Emia, deputy chief sa Talisay Police Station, niangkon nga sulod sa duha ka semana nila nga gipaubos sa surveillance ang mga dinakpan.
“Clever ni siya’ng bayhana, iya pa mi nga giduwa-duwaan kung asa sila nga kwarto,” nagkanayon si Emia.
Dugang ni Emia nga si Morales maoy nakasunod sa iyang bana nga natanggong na sa Talisay City Jail.
Samtang nasikop usab ang managsuong Elsie Estrera Bacalso, 55 anyos, ug Ophelia Bacalso Bardilas, 59 anyos nga taga Barangay San Roque atol sa buy bust operation.
Nasakmitan sila og 47 ka mga gagmay nga pakete ug upat ka medium pack sa gituohang shabu nga mobalor sa P111,000.
Si Elsie ang dali nga gidala sa tambalanan, human nga nagka-hypertension, samtang ang igsuon ang natanggong na sa bilangguan. (Superbalita Cebu)