LAING Filipino boxer nasukamod sa kontra pildi unanimous decision sa ilang walo ka hugna nga away sa Amerika Sabado, Hulyo 13, 2019.
Si Ricky “Chocolate Hills” Sismundo (35-14-3, 17KO) napildi batok ni California-based apan lumad taga Karaganda, Kazakhstan nga si Ruslan Madiyev (13-1-0, 5KO) sa ilang 8-round non-title Light Welterweight fight nga gipahigayon sa Dignity Health Sports Park sa Carson, California.
Si Sismundo gikataho nga bag-ong sakop sa New Champ Promotions; siya kanhi Cebu-based ug kanhi Japan-based fighter nga tag-iya na'g basakan. Ang 32-anyos nga lumad nga taga Lungsod sa Ubay, Bohol nalupig sa birada apan wala basta-basta moisa sa puti nga bandera batok sa kontra.
Ang Sismundo vs Madiyev usa lamang sa mga paresan sa title fight nila ni Rey Vargas vs Japanese Tomoki Kameda alang sa WBC Super Bantamweight division sa card nga gidalit sa Golden Boy Promotions.
Si referee Max DeLuca (California, USA) mihatag sa 78-74, Kevin Scott (North Carolina, USA) mitali sa 79-73 ug Hubert Minn (Hawaii, USA) adunay 78-74 tanan pulos pabor ni Madiyev.
Kini maoy ikatulong sunud-sunod nga kapildihan ni Sismundo diin ang duha niini batok nila ni Maxim Dadashev (Russia) ug Lei Wang (China).
Samtang si Madiyev nakabawi gikan napildi ni Mexican Pablo Cesar Cano. (Daniel Quindao Guden, US Correspondent)