PATAY na nga napalgan alas 5:55 sa hapon, Dominggo, Hulyo 14, 2019 ang 5-anyos nga si John Clark Ebua human mahulog sa box culvert sa Exoville, Barangay Basak Pardo, Dakbayan sa Sugbo.
Matud ni Konsehal Dave Tumulak sa kagamhanan sa Dakbayan sa Sugbo nga human mibundak ang kusog nga ulan kalit lang nga miguho ang lawas ni Ebua sa tulay sa Tagunol tunga-tunga sa Barangay Basak San Nicolas ug Barangay Cogon Pardo.
Milanat og kapin sa 27 ka oras ang gilusad nga search and retrieval operation una napalgan ang bata.
Tungod sa kadaghan sa basura sa kanal, gituohan nga didto nasangit ang lawas sa biktima ug sa dihang mibunok ang kusog nga ulan pasado alas 5 diha na migawas ang patayng lawas sa bata.
“Ni-surface siya pagkusog sa ulan. Among gigamitan og backhoe aron mahawan ang mga basura pag-ulan og kusog kaayo. Usa ni sa nakatabang nga migawas siya,” Matud ni Tumulak.
Misaad ang konsehal nga ang kagamhanan sa Dakbayan sa Sugbo ang moabag sa gasto sa pagpalubong sa biktima.
Si Basak Pardo Barangay Captain Catalina Cabardo nga nahinabi sa Superbalita Cebu nagkanayon nga human sa nahitabong aksidente nga gikamatay sa 5-anyos diha pa sila nasayod nga aduna'y culvert nga abli sa iyang barangay.
Wala ni ma-report sa barangay nga aduna'y culvert nga delikado sa mga bata kon mobunok ang kusog nga ulan.
Pasalig niya nga sila na sa barangay ang motabon niini pinaagi sa pag-welding og puthaw aron dili na masubli pa ang aksidente.
“Kon na-report pa ni dayon sa barangay, amoa na ning ma-welding. Karon mura mi'g na alarma. Kami sa barangay dili nalang mi mo adto sa city. Kami nalang sa barangay ang mobuhat ani. Weldingon ra man ni niya katong gipangbuak kami nala'y mo-rehab ato,” matud ni Cabardo.
Awhag pud niya sa mga ginikanan nga dili pasagdan ang ilang mga anak nga magduwa-duwa panahon kon mobunok ang ulan.
Ang bata giingong taga Kinasang-an apan naabot kini sa Barangay Basak Pardo uban sa iyang mga kaila nga mga bata. (Superbalita Cebu)