GIBUTYAG sa Davao City Police Office (DCPO) nga dunay pag-ubos sa ihap sa kasong lugos sa dakbayan sa 51 porsiyento o 39 ka kaso gikan Enero hangtud Hunyo 2019 itandi sa susamang panahon sa 2018 nga dunay 80 kaso.
Sa paghinabi kang DCPO crime registrar Police Staff Sergeant Edilyn Presscy Mandi Morillo, gisulti niini nga ang maong kalampusan mahimong tungod sa paningkamot nga gihimo sa kapulisan sama sa ilang awareness campaign ilabi na sa kabataan kinsa "vulnerable" niini.
Gipalig-on sa DCPO ang ilang programa nga gitawag og Kinder cops nga gilunsad niadtong 2017.
Ang programa nagtinguha sa pagduso alang sa mga adbokasiya sa tunghaan sama pananglit sa "awareness" sa mga tinun-an sa "good touch and bad touch". Ang target niini mao ang mga tinun-an sa kinder hangtud na high school.
"Sa Women and Children Protection Desks (WCPD), naa silay mga programs nga mag-visitation sila or mag hatag leaflets or pulong pulong para ma-aware (any public) or PCR (Police Community Relations)," butyag ni Morillo.
Niining programa, sumala ni Morillo nga mga batang babaye makaamgo sa posibleng hulga ug mahibawo kon unsaon pagpakgang niini.
Base sa ilang datos, sa 2019 kasagarang kaso sa gitaho nga lugos narehistro sa Buhangin Police Station (PS) uban sa unom ka kaso; lima sa Bunawan PS ug Tugbok PS; upat sa Talomo PS, Toril PS, ug Sasa PS; tulo sa sa Calinan PS ug Marilog PS; duha sa Sta. Ana PS ug San Pedro PS; ug usa sa Paquibato PS.
Dugang ni Morillo nga kasagaran sa mga suspek sa lugos mga paryente sa mga biktima. Kasagaran sa mga kaso, nahitabo kini sud sa ilang mga balay kon diin mga pulis way kontrol niini.
Sa milabay nga katuigan, nakatala ang DCPO og kinatibuk-ang 125 kasong lugos sa 2015, 129 sa 2016, ug 108 sa 2017.
Gipalihok sab sa awtoridad ang Oplan Sagop Kabataan alang sa posibleng pagluwas sa mga menor de edad nga makita sa mga pampublikong lugar gikan sa alas 10 sa gabii pataas aron pagwagtang sa presensiya sa mga menor nga mahimong malambigit sa kriminalidad.
Kahinumdoman nga sa milabay nga tuig, tulo ka mga suspek sa lugos ang napatay sulod sa police station human gituohang nangilog og armas sa pulis nga nagbantay kanila.