NAPALGAN gawas sa pansayan ang patay nga lawas sa usa ka lolo samtang anaa usab sa sulod ang iyang apo human niulbo ang kalayo nga nilamoy sa usa ka panimalay sa Calaanan Relocation Site, Barangay Canitoan, Syudad sa Cagayan de Oro mga alas 3:40 sa kaadlawon, Sabado, Hulyo 13, 2019.
Patay si Vomidiano Ramoga, 64 anyos ug Chester, 11 anyos.
Sa inisyal nga imbestigasyon sa Bureau of Fire Protection (BFP) posibleng ang butane gas maoy hinungdan sa pag-ulbo sa kalayo.
Gituohan nga nasaghiran sa iring ug nahulog ang butane gas ngadto sa dinagkotan nga mosquito killer hinungdan sa pag-ulbo niini.
Gibana-bana nga moabot ngadto sa P200,000 ang danyos sa sunog diin giingong bisan usa ka butang walay nasalbar ang pamilya.
Samtang ang barangay dali nga nihatag sa nag-una nga panginahanglanon sa pamilya labina sa pagkaon ug nisaad nga ipahiluna ang duha ka mga patay’ng lawas.