BISAN kon giingnan na sa Commission on Audit niadtong 2017, wa gihapon gibalik sa kagamhanan sa lalawigan sa Sugbo ngadto sa Nasudnong Panudlanan ang nahabilin sa wala magamit nga Priority Development Assistance Fund (PDAF) balance nga mokabat og P40,769,414.12.
Kini ang nakompirmar sa COA base sa ilang 2018 audit report.
Matod sa COA, ang mga pundo wala gamita ug anaa lang sa panudlanan sa lalawigan sud sa lima ngadto sa 12 ka tuig, bisan kon way basehanan o pagtugot sa paggamit niini alang sa mga proyekto.
“In view of the actual of PDAF as trust funds, ...management’s inaction in applying the funds to its intended purposes for 5 to 12 years is an indication that the funds were no longer needed,” niingon ang uwahi nga audit report sa COA sa 2018.
Ang COA nagtuo nga ang bisan unsa nga disbursements nga gikan sa maong mga pundo alang sa umaabot nga mga programa ug mga proyekto nga way basehanan o pagtugot, mahisupak sa Section 4 (3) sa Presidential Decree 1445.
Alang sa mga state auditor angayan ibalik kini sa Nasudnong Panudlanan ang mga pundo aron magamit sa nasudnong kagamhanan alang sa mas mahinungdanon ug dinalian nga mga proyekto.
Niadtong 2013, ang Korte Suprema nideklarar nga “unconstitutional” ang paggamit sa PDAF gikan sa mga magbabalaod.
Sa exit conference, si Provincial Legal Officer Orvi Ortega niingon nga ang ilang desisyon sa pagpugong sa mga pundo kay gibase sa desisyon sa Korte Suprema nga ang mga pundo nga napagawas na ngadto sa mga ahensiya kay dili na sakop sa injunction. (SCG)