MOPATAWAG og panagtigom karong alas 2 sa hapon, Lunes, Hulyo 15, si Mayor Edgardo Labella aron susihon ang mga barangay nga gilagbasan sa upat ka dagkong sapa nga nahimutang sa sentro sa siyudad.
Lakip sa ipatawag ni Labella ang City Environment and Natural Resources Office, Department of Public Works and Highways, Department of Engineering and Public Works, Management Information and Computer System, Department of Public Services ug uban pa.
Tuyo ni Labella nga mahan-ay na ang tanang preparasyon alang sa ipahigayon nga halapad nga paglimpyo ug pagpalawom sa upat ka dagkong suba ug mga sapa aron mahibalik ang kanhi kaanindot sa kasapaan.
Gitug-an sa mayor nga dunganon og limpyo ang Mahiga creek, Parian ug Tejero creek, Guadalupe river ug Bulacao river nga maoy nagsilbi nga agianan sa tubig baha paingon sa dagat.
Gawas sa Engineering battalion sa Philippine Army, paapilon og limpyo ni Labella ang tanang departamento ug buhatan sa City Hall, mga barangay ug modawat sab sila og volunteers.
Ang mga department head, pangulo sa opisina, mga elected official dili sab makalinggawas sa massive clean up ug dredging sanglit gipadayag ni Labella nga mismo siya ang mangunay sa paglimpyo.
Wala pa makapili og adlaw si Labella apan gusto niya nga ipahigayon sa Sabado ug Dominggo diin ang CENRO na maoy modumala kalimpyohon sa mga suba ug sapa.
Ang matag departamento ug opisina dunay tahasan si Labella mga molista sa mga pangalan sa niapil sanglit kadtong dili mosanong posibleng silotan subay sa mando sa kalapasan sa balaud. (PAC)