GIDUDAHAN nga tinuyo ang nahitabong sunog sa Purok Ube, Barangay Gun-ob, siyudad sa Lapu-Lapu niadtong Dominggo, Hulyo 14, sa kaadlawon nga nilamoy og 151 ka mga balay.
Usa ka lalake (ngan gipugngan samtang wa pa kini mahinabi ning mantlaan) giila sa mga residente sa lugar nga nakit-ang nagbitbit og tulo ka plastic bag nga gasolina.
Ang maong lalake giingong adunay gikalalis nga residente nailhan lang sa pangalang 'Deborah' ug matod pa, mibahad ang suspek nga iyang sunogon ang balay niini.
Si Deborah giingong asawa sa anak ni Juanito Vanflor, tag-iya sa balay diin giingong nagsugod ang sunog.
Ang usa sa mga silingan nga si Fredilito Miao, ang lalake ug si Deborah nagkalalis gumikan lang sa mga istoryang komedya nga miresulta sa panaglalis hangtod nga mibahad si Ebrado nga sunugon ang balay ni Deborah.
Usa sa mga saksi nga si Orlita Payusan mibutyag nga nianang pagka-gabii iyang nasugatan ang lalake nga nagdala og mga plastic bag ug mipahibawo nga: “Dili mo motan-aw ug show nga sunog?”
Dugang sab ni Payusan nga nagdala usab ug goma ang lalake niadtong tungora.
Wa magdugay miulbo ug dali nga mikatap ang kayo sa dapit. (Meira Claire Jamisola, CNU Communications Intern)