KANHI Daanbantayan mayor ug retirado nga heneral sa kapulisan Vicente Loot nagpatabang na sa National Bureau of Investigation (NBI) sa Central Visayas (CV) aron siya mapaubos sa imbestigahan.
Sa iyang gipadala nga suwat sa regional director sa NBI 7 pinetsahan og Hulyo 13, 2019, siya nipadayag sa iyang kaandam nga maimbestigahan sa kanunay nga pasangil ni Presidente Rodrigo Duterte batok niya nga nalambigit siya sa illegal drug trade.
“Knowing I am innocent of the charges from the very start, I respectfully request an independent investigation to be conducted by your office on the matter to establish the truth about the accusations, past and present,” matod sa kanhi mayor sa iyang suwat.
Siya nipadayag nga kanunay siya nga subject sa sayop nga mga impormasyon nga bisan ang Presidente ang nituo usab niini nga sakto.
“Please help me, Sir. I look forward to your grant of my request,” dugang sa retirado nga heneral.
Sa pakigpulong ni Duterte sa Malacañang niadtong Lunes, Hulyo 8, iya na usab gipikhan si Loot sa giingong kalambigitan niini sa gidili nga drugas ug nahibung kon nganong buhi pa kini.
Si Police Regional Office (PRO) 7 Director Debold Sinas unang nibutyag nga nag-monitor karon ang Regional Intelligence Division (RID) sa nahimutangan ni Loot.
Si Loot ginganlan ni Duterte niadtong 2016 nga usa sa lima ka mga heneral sa kapulisan nga apil sa illegal drug trade.
Ang kanhi mayor sa lungsod sa Daanbantayan katapusang nakit-an sa publiko niadtong Enero 4, 2019, dihang nibalik kini sa municipal town hall.
Niadtong Mayo 2018, nakalingkawas sa ambush ang retirado nga heneral ug iyang pamilya sa pantalan sa lungsod.
Wa na siya modagan og balik sa eleksyon niadtong Mayo 13 ning tuiga.
Sa iyang suwat sa NBI, iyang gipasukip ang Investigation Report sa Criminal Investigation and Detection Group niadtong Oktubre 2016 nga naglimpyo niya sa mga pasangil bahin sa illegal drugs. (Dugang ni SCG)