NAGTUO si Anthony Davis nga adunay kapasidad ang Los Angeles Lakers nga mahimo pagbalik nga championship contender sa sunod season sa NBA.
Mao kini ang gipadayag sa six-time All-Star kagahapon (RP time) dihang pormal siyang gihangop sa organisasyon sa multi-titled squad.
Ang 26 anyos nga superstar mibiya sa New Orleans Pelicans aron makigtambayayong kang four-time MVP LeBron James sa Lakers, nga sulod na sab daghang katuigan nga wala nakasulod sa playoffs.
Gawas kang Davis, nakuha sab sa Lakers sila si Danny Green gikan sa kasamtangang kampiyon nga Toronto Raptors ug DeMarcus Cousins gikan sa Golden State Warriors.
Ang nangahisgutang dekalidad nga mga magduduwa mao ang magsilbeng mga lider sa Lakers, nga mikuha sab ni Frank Vogel isip bag-o nilang headcoach.
“I’ll put our roster up against anybody,” matod ni Davis. “In a seven-game series, I think we’ll come out victorious.”
Ang general manager sa Lakers nga si Rob Pelinka nagkanayon nga ang bag-o nilang puwersa makapausab sa dagan sa ilang kampanya.
“There is no more complete basketball player in the game,” matod ni Pelinka kabahin kang Davis. “There is nothing he can’t do. He can shoot. He can make plays. He can defend 1-5. He can protect the rim. He can handle the ball. His dedication to his craft is unparalleled.”
Gitataw ni Davis nga nagpanikad na siyang makig-uban kang James ug sa bag-o niyang mga kauban.
“I’m playing. I’m 26 years old. I love the game of basketball. I’m ready to play.”
Sa laing bahin, No.3 na ang numero nga gamiton ni Davis sa iyang jersey ug itugyan na lang niya ang No.23 nga magpabilin kang James.
Dihang nagduwa pa siya sa Pelicans, ang No.23 maoy gigamit ni Davis.
Sa sayo pa, miuyon ra unta si James nga si Davis maoy makagamit sa No.23 apan nausab ang tanan gumikan sa patakaran sa Nike nga maoy sponsor ni James. (AFP, ESL)