WA MAKABALDA ni Manny Pacquiao ang pagsigi og pagarpar sa iyang kaatbang nga si Keith Thurman.
Matod ni Pacquiao nga wala makadisturbo sa iyang preparasyon ang pagsigi og pangataki ni Thurman ug gani nakadasig pa kini kaniya aron iyang malangkatan kini niya og titulo sa ilang away karong Hulyo 20 (Hulyo 21 sa Pilipinas) didto sa MGM Grand sa Las Vegas, Nevada.
“He can say whatever he wants. Padaldalin mo lang (Just let him talk),” matod sa giilang Pambansang Kamao sa Pilipinas kinsa maoy naghupot sa WBA regular welterweight.
Pero iyang gipasumbingay nga si Thurman sama sa usa ka iro nga nagsigi og paghot apan dili mopaak.
Susama ra usab kini usa ka sapa nga mabaw, apan saba.
Gipaabot nga mosamot pa ang pagpabuhagay og mga mahait nga pulong ni Thurman ngadto ni Pacquiao atol sa fight week sa Las Vegas.
Samtang sa panahom ni American Hall of Fame trainer Freddie Roach, ma-knockout sa Filipino boxing icon Pacquiao si Thurman sulod sa siyam ka rounds.
Ang fighting senator, kinsa adunay 61-7-2, 39 KOs nga rekord, nagtinguha nga maoy labing unang makapilde kang Thurman, kinsa adunay 29-0, 22KOs nga baraha.
“I don’t think it will end early. Both are tough guys and usually are in long distance fights so I think Manny’s gonna knock him out about the ninth round,” matod ni Roach nga napatik sa www.boxingscene.com.
Kumbensido si Roach nga dili masagubang ni Thurman ang kapaspas sa mga kumo ni Pacquiao.
“I think Thurman can’t handle Manny’s speed and Manny’s speed is continuous, it doesn’t go away halfway through the fight,” dugang Roach.
Si Pacquiao naglungotlungot kang Thurman gumikan sa mga pasiatab niini.
Sa sayo pa, nagkanayon si Thurman nga iyang pakamangon ang bugtong 8-division world champion sulod sa unom ka rounds. (ESL)