Editoryal: Kaluwasan sa dalan

DALAYGON ang lakang sa pipila ka mga opisyal sa Department of Education (DepEd) sa Sugbo ug sektor sa transportasyon nga ilakip sa school curriculum sa ‘K to 12’ bahin sa kaluwasan sa kadalanan o road safety isip nagmaneho sa sakyanan o ang mgsa tawo nga naglakaw sa dan aron malikayan o kaha kaminosan ang mga aksidente sa dan.

Halos tanang problema sa trapiko ug aksidente sa dalan nagsumikad sa kakuwang o walay kahibalo bahin sa balaud sa trapiko ug transportasyon sa kinatibuk-an, pun-an sa dili maayong pamatasan busa mabulilyaso ang tanan ug daghang mapagan.

Ang World Health Organization (WHO) adunay natala nga 1.35 million nga nangamatay sa aksidente sa kadalanan sa miaging tuig sa tibuok kalibutan.

Ang sayong pagkat-on sa mga bata bahin sa kaluwasan sa dalan dako og matabang sa pagmatuto sa usa ka maayong molupyo sa umaabot ug ang pagseguro nga hapsay sa dagan sa trapiko magsugod sa disiplina sa usag-usa kanato.

Siyembre, walay supak ang tanang stakeholders sa pagpatuman sa maong kawsa. Maayong mapadali ang pag-apil niini sa curriculum sa elementarya. Unsay atong dugayan?

Apan sakto usab ang kabalaka ni Dr. Benito Dagatan, DepEd Cebu City Superintendent, nga uyon sa maong sugyot apan dili siya gusto nga magdalidali sa pagpatuman niini ug seguruhon nga hapsay ug insaktong pamaagi sa han-ay nga proseso sa pagtuon.

Tinuod, kinahanglan nga tun-an unsaon sa pagpaambit sa mga bata aron dili mausik ang panahon ug salapi. Ang walay tino nga kahibalo mas peligro usab. Ang linghod nga panghunahuna sa mga bata maayong masudlan daan sa mga importanteng kahibalo sa kaluwasan sa dalan nga unang gisugyot nga mahimong kabahin sa Araling Panlipunan, Values Education, ug uban pa.