Biliran way klase tungod sa bagyong 'Falcon'

NAVAL, Biliran -- Nagdeklarar na og class suspension karong adlawa ang tanan lungsod sa lalawigan sa Biliran, Lunes, Hulyo 15, 2019.

Kini tungod sa grabeng uwan nga nasinati karon lukop lalawigan dala sa bagyong Falcon.

Matod ni Biliran Provincial Disaster Risk Reduction and Management (PDRRM) officer Jun Dacillo, naka stand by na sila karon.

Ilang gi-monitor ang mga lugar sa lalawigan nga delikado sa pagbaha.

Apil nila nga gimonitor ang lebel sa tubig sa mga sapa sa lalawigan.

"Duna nay pagsaka sa level sa tubig pero normal naman hinuon ni. Mas maayo siguro ni kay sa miaging semana grabe ang init but di sab ta mag ampo nga mosaka kay magbaha man sab," matod ni Dacillo.

Giabisohan ni Dacillo ang tanan residente nga magbantay sa palibot, magmonitor sa dagan sa panahon ug dapat mo bakwit kung gikinahanglan na.

Andam na usab ang mga evacuation centers sa lalawigan.

"Naka ready na ta karon. So far, klase raman ang gisuspend, walay labot sa government," matod ni Dacillo.

Samtang ang Department of Education Leyte Division niingon nga napaabot na sa lokal nga kagamhanan sa mga lungsod ang pagdeklarar og class suspension.

Alas 2 ganinang kadlawon, nahimong bagyo ang low pressure area nga nasigpatan sa Guiuan, Eastern Samar ug ginganlan kini og Falcon.

Alas 4 sa kadlawon, nasigpatan ang bagyo sa 990 kilometros east sa Virac, Catanduanes.

Matod sa Pagasa, makasinati og pag uwan ang Eastern Visayas ug Bicol Region tungod sa trough sa bagyo.

Ang ubang lugar sa Visayas ug Mindanao uwanon usab tungod sa Habagat. (JKDP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph