DILI nato masabtan kung nganong may panahon nga magsunod ang kasakit.

May higayon nga nagsunod ang pagkamatay sa atong mga kaila.

Sulti sa uban nga morag “kadena de amor”, “huwis de kutsilyo”, prosesyon sa kasakit, “dolorosa”, ratsada sa kaguol, ug uban pa. Sa niaging upat ka semana tulo sa akong mga higala ang nipanaw ug nibalik nga ngadto sa Amahan.

Namatay si A Teacher Party List Representative-elect Mariano “Nonoy” Piamonte sa gihambin niyang sakit. Wala siya nakalingkod sa ika-18 nga Kongreso sa pag-abli niini niadtong Hulyo 1.

Sa niaging semana, namatay usab ang para kanako numero uno nga photographer sa Davao nga si Tatay Rene Lumawag. Dugay na nakong kaila si Bay Rene nga gitawag sa bag-ong henerasyon nga Tatay Rene dili sa iyang pagka-maniniyot kon dili sa iyang pagkamagsisibya sa radyo sa DXMC o DXUM Radyo Ukay na karon.

Nagkauban sila kaniadto sa unang Managing Editor sa Superbalita nga si Ely Luciano. Gikan sa pagka-magsisibya, iyang gisulayan ang pagka-photographer gamit ang pinakabarato ug simple nga kamera hangtod nga hinay-hinay siyang naka-ipon og kwarta aron ipalit og mas maayo og sopistikadong kamera.

Dili lisod ang pagkahimo niyang eksperto sa maong larangan kay una siya niabot sa Davao, nahimo siyang tigdibuho, tig-design sa usa ka buhatan sa gobyerno.

Nahimo siyang photographer sa mga lokal ug nasyunal nga pamantalaan ug iyang nasunod ang progreso sa politikanhong kinabuhi ni Presidente Rody Duterte sa sobra duha ka dekada niining pagka-mayor.

Busa sa paglingkod ni PRRD sa Malacañang, gidala niya si Tatay Rene isip sakop sa iyang opisyal nga photographers. Dunay higayon nga magkadungan kami og kaon sa paniudto ni Tatay Rene sa usa ka gamay’ng karendiriya haduol sa ilang balay sa Jacinto Extension.

Paborito namo ang law-oy ug isdang paksiw. May gibati na siya sa iyang lawas niadtong panahona ug matud pa niya nga medyo di na niya kaya ang pinaspasay ug walay tulogay nga trabaho sa pag-cover sa mga aktibidades sa pangulo.

Sa laing bahin namatay usab ang among maestra sa St. Michael nga si Ma’am Rebecca “Ivy” Salinas sa panuigon nga 73-anyos. Nasangit siya sa usa ka nagdagang pick-up sa McArthur Highway sa may Bangkal ning syudad.

Gikan sa St. Michael’s School of Padada, nibalhin siya og tudlo og Mathematics sa Ateneo de Davao High School hangtod nga iyang pagretiro. Suod sa tanang niyang estudyante si Ivy tungod sa iyang pagka-manghigalaon ug pagkasimple sa tanang butang.

Dugay na siyang biyuda sa iyang bana nga si Jun Salinas ug wala silay anak. Human sa iyang retirement, aktibo siya sa iyang pag-volunteer sa kongregasyon sa Missionaries of the Immaculate Conception (MIC) nga maoy nagdumala sa daghang eskwelahan sa Davao region.

Daghang kaayong kinabuhi nga nahikap ni Ivy sa hamubo niyang kinabuhi isip igsuon, asawa, silingan, magtutudlo, church worker ug sumusunod ni Kristo. Ang iyang patay’ng lawas gihaya sa punerarya sa Padada. Ilubong siya sa alas 2:00 sa hapon sa Hulyo 17 didto sa Memorial Park sa Paligue. Malinawong paglawig ninyong duha.