Linog sa Mati moigo sa Davao

GIBUTYAG sa opisyal sa Philippine Institute of Volcanology and Seismology (Phivolcs) nga kon molihok ang Mati Fault Segment, moresulta kini og posibleng kusog nga linog o “The Big One” nga moabot og kapin 8 magnitude ug makamugna og dakong kadaut ilabi na sa dakbayan sa Davao.

Gikanayon ni Svetlana Cataoera, project assistant 1 sa Phivolcs Davao Field Office, Lunes, Hulyo 15, nga sama sa Metro Manila kon diin duna niining “The Big One” kon ang West Valley Fault System molihok, ang Davao Region makahiagom sab og katalagman kon ang Mati Fault System moaktibo.

“Ang kanyang pwedeng i-release na magnitude is actually eight or greater. Ibig sabihin niyan kahit malakas ‘yong lindol ‘don sa Mati area, ‘yong greatest impact niya or as to damage toll, mas madami talaga is from Davao City kahit nanggaling ‘yong epicenter sa Mati,” tin-aw ni Cataoera atol sa press conference Lunes sa Grand Regal Hotel.

Iyang dugang gi-esplikar nga kon hisgutan ang “geology” o ang matang sa yuta sa Mati City, mas gahi kini itandi sa siyudad sa Davao nga mas sensitibo sa makadaut nga epekto sa linog. Ang Davao City mabati og 6 hangtud 8 intensity.

Apil sa peligro kon moigo ang maong linog naglakip sa paglihok sa yuta, pagkabusgak sa yuta, liquefaction, earthquake-induced landslide, ug sunog.

Gawas sa Mati Fault System, gimonitor sab sa Phivolcs ang Central Davao Fault System nga dunay lima ka segments ug nilatas sa 60 ka barangay. Makamugna sab kini og kadaut ngadto sa siyudad, ilabi na sa habagatang bahin.

Ang pinakakusog nga linog nga niigo sa Davao Region nahitabo niadtong 1893 sa dihang 7.2-magnitude nga linog miuyog sa Monkayo sa Compostela Valley.

Iya sab nga girekomenda ang pagpatuman sa “no-building zone” ilabi na ibabaw sa aktibong fault line aron nga mapugngan ang dakong kadaut.