DI ikalimod nga nangita ta karon sa matuod nga manluluwas. Sa dakong kalisod nga giatubang sa nasod, tinuon ta gyud kon kinsa sa mga kandidato pagka pamuno karon ang tinuod nga makaluwas kanato.
Sa ilang mga advertisement o anunsyo sa TV, ang matag usa makaluwas gyud. Nia dinhi ang duwa. Kinsay makabitik nila og daghang botante mahimong Pamuno sa nasod.
Ania sila si Villar nga gikan pagka kabos nahimong bilyunaryo, andam mopapha siya sa atong kakabos. Si Noynoy nga nagpuhonan sa iyang pagka anak sa mga bantugan apan di kurakot nga mga ginikanan, di mangawat ug mopitol sa mga kurakot.
Si Erap nga bisan sa iyang pagkakombikto sa salang plunder kun pahimus-kawat sa bahandi sa nasod sa Pamuno pa siya, nitanyag sa iyang kaugalingon alang sa kabuhong sa atong pagpuyo.
Ang taga Olongapo nga si Dick Gordon nagtanyag pod sa iyang kaugalingon kinsa may kasinatian sa pagtabang tungod sa Phil. National Red Cross nga iyang gipangulohan.
Ang religious leader nga si Eddie Villanueva morag katuohan kay magsasangyaw sa pulong sa Dios. Apan sa survey nangiwit. Si Gibo Teodoro, milyunaryo, gisabak sa administrasyon, namukway sa survey ug buot gyud sad mag-Presidente sa nasod.
Alang ning lindog, ang matuod nga manluluwas kinuha sa kahitas-an nga kalit moabot kanato. Siya matarong, buotan, kugihan ug mait-on. Makigharong siya ni bisan kinsa nga mopasipala sa atong mga katungod. Andam mohalad sa iyang kaugalingon sa kaayuhan sa uban.
Lisod kining pangitaon sa han-ay karon sa atong mga presidentiables. Sila nahasa o naanad sa kahamugaway. Ang ilang rekord nagtala sa ilang kasinatian sa kahugaw sa pulitika. Sa ato pa sila mga maru na daan.
Dunay kanhi Pamuno, ang tulo senador, usa kanhi kongresista , dunay konsehal ug ang katapusan nidagan pagka pamuno, apan tikay-ang. Nibalik na sad siya sa pagdagan.
Kay wa man nila ang gipangita natong manluluwas, ang pilion na lang mao kadtong may tipik sa mga hiyas sa manluluwas nga atong gihisgutan dinhi. Apan seguruon nato nga siya di kawatan.
Seguruon sad nato nga way dugo sa pagkaadik sa gahom. Kon human na sa termino, ang kaliwatan dayon ang padaganon. Kondi siya gyud mismo apan sa lain na nga posisyon. Hangol pa sa bitok.
Labing seguro ang atong mapili di santos, apan atong panghinauton nga siya usa ka tawo nga maligdong, ug nakasabot sa atong kakabos. Di makalimot nga siya ulipon di agalon sa katawhan.