NAKALITAN ang mga opisyal sa Bureau of Customs sa Sugbo dihang nabalita nga himuong usa ka museum ang karaang Customs building nga nahimong Malacañang of the South sa panahon ni presidente Gloria Macapagal-Arroyo.
Dugay naman gud nga nagtinguha ang mga opisyal sa bureau nga mabalik nila ang maong edipisyo kay hangtod karon, wa pa gyuy klarong opisina ang atong gitugyanan sa pag-kolekta og buhis bunga sa atong pagpakignegusyo sa ubang mga nasud.
Samtang dunay pagsuporta sa kadagkuan sa Bureau of Customs kining maong tinguha kaniadtong nagsugod ang termino ni Presidente Rodrigo Roa Duterte, di na kita seguro kon ingon ba niini ang baruganan karon ni Customs Commissioner Rey Leonardo Guerrero ug ang bag-ong acting Cebu District Collector Charlito Mendoza.
Tingale, moisyu kini sila og opisyal nga mga pamahayag karong mga mosunod nga mga adlaw. Nindot kini atangan sa mga umaabot nga mga taho ni senior reporter sa SunStar Cebu, Ely Baquero.
Kon wala ko masayop, kining idea nga himuong usa ka museum ang maong edipisyo nagsugod sa panahon nga na-mayor si Mike Rama.
Sa pagkakaron, atong nasabtan nga ang maong plano naa nay pagsuporta ni Presidential Assistant Mike Dino ug Executive Secretary Salvador Medialdea.
Sa edad sa maong building ug sa desinyo niini, nindot gyud tuod siyang himuong usa ka museum. Sa ingon, mahimong usa ka dakong tourism area ang maong dapit.
Alang kanako, dunay mga punto ang duha ka habig apan ang modesisyon niini mao ang Malacañang.
Wa pa ko makalimot nga sa Sinulog 2018 dihang unang gihimong usa ka dapit sa Sinulog fair ang Plaza Independencia, ang mga kadagkuan mismo sa Malacañang ang gihangyo aron maablihan bisan makadiyot ang dalan atubangan sa Malakanyang sa Sugbo.
Sa laing punto, nalipay ra ko nga nakakitang giablihan na karon ang maong dalan.
Isko ug Labella
Unang mga adlaw pa lang sa iyang pagka mayor, nalimpyo dayon ni Mayor Isko Moreno ang Divisoria didto sa Syudad sa Manila. Alang kaniya, tipik lang kini sa iyang responsibilidad sa pagka mayor.
Dinhi sa Sugbo, ang paglimpyo sa kasapaan ug mga kanal mao sab ang gipadayag nga unang programa ni Mayor Edgar Labella.
Ting-ulan na ra ba ug kon magpabiling barado ang atong drainage system tungod sa mga basura, siguradong mobaha labi na diha sa downtown area.
Ang nakanindot karon kay si Mayor Labella mismo niingon nga mokuyog siya sa paglimpyo. Maka-inspire kini sa mga Sugboanon.
(@anol_cebu sa Twitter)