KINSA kining usa ka bag-ong napili nga opisyal nga morag naboang sa iyang gugma sa usa ka babaye nga mas manghod pa kaniya? Dugay na kini siyang misulod sa pulitika apan napilde ug napili sa usa ka posisyon niadtong milabay’ng eleksiyon. Gikontrahan siya sa iyang mga kabanay labi pa sa iyang igsuon gumikan kay iyang gidala ang iyang babaye sa ilang ancestral house. Naa usab sa maong compound magpuyo ang iyang mga kabanay.
Wala makagusto ang kabanay ning maong pulitiko sa babaye gumikan sa batasan niini nga hawud-hawuron ug sa iyang background. Gumikan niini, giaway ang maong pulitiko sa iyang mga kabanay ug gipapahawa ang babaye. Apan miunong ang pulitiko sa babaye. Nagpuyo sila karon sa usa ka inabangan nga apartment apan tig-ulian gihapon ang pulitiko sa ilang ancestral house nga siya rang usa.
Ang mga kabanay gusto nga pabuwagan sa pulitiko ang babaye. Mihulga sila nga dili na mosuporta sa pulitiko sa sunod nga eleksiyon kon dili niya kini buwagan. Ang babaye matod pa nga maoy maghawod-hawod sa buhatan sa pulitiko. Gani bisan walay official nga designation, usa siya sa mga mo-screen sa mga aplikante. Nakapasulod na ang maong babaye og 15 ka mga personnel.
Bisan man gani ang mga supporters ug mga higala sa pulitiko, midistansiya na kaniya. Matod pa nga kon duna silay ihangyo sa pulitiko, moingon man ang pulitiko nga “talk to her.” Daghan naman unta og nangaging gikarelasyon ang pulitiko apan morag karon ra man kuno siya nagsalimoang sa iyang naghiguwa-os nga gugma.
Wala may problema nga mahigugma ning maong pulitiko kang bisan kinsa kay iya man kanang kinabuhi. Walay labot ang lungsod ana. Wala man poy legal nga babag gumikan kay annulled naman ang kaminyuon ning pulitiko sa iyang unang asawa. Unya dalaga man usab kining babaye. Apan kon ang babaye mag-apil-apil na sa official functions sa pulitiko, aw, lain na usab kanang estorya. Mao nay giingon nga “Kamo bay mahigugma, lalim ba?” O sama sa usa ka kanta nga “Salimoang sa gugma.” (bobbygnalzaro@gmail.com)