DAGHANG bahin sa Mindanao kanunayng sentro sa kontrobersya sa matag eleksyon - alegasyon sa halapad nga ballot switching, tampering ug uban pa, gawas sa problema sa kahusay ug kalinaw.
Sa unang poll automation sa kasaysayan sa nasod karong Mayo 10, gilauman nga mawagtang o di ba kaha makunhoran ang maong mga problema nga motumaw panahon sa eleksyon.
Laing dakong problema ang naghulga sa poll automation - ang enerhiya. Gideklarar na ni Presidente Arroyo ang krisis sa enerhiya sa Mindanao tungod sa grabeng huwaw mugna sa El Niño phenomenon. Ang brownout sa pipila ka dapit nga moabot na og walo ka oras.
Gani, ang problema sa enerhiya di lang sa Mindanao lakip sa Kabisay-an ug Luzon.
Kon di kini mapangitaan og dinaliang solusyon o pagpangandaman, molampos kaha ang poll automation? Di kaha kini tinubdan na usab sa laing kagubot?
Nasayod kita nga ang kuryente importante kaayo sa pagpadagan sa Precinct Count Optical Scan (PCOS) machines.
Si Sec. Angelo Reyes sa Department of Energy (DOE) nipasalig nga way pagkaputol sa kuryente panahon sa eleksyon.
Apan base sa gipamulong ni Sec. Reyes sa mga miaging isyu enerhiya ug lana, makalaom kaha kita sa iyang pasalig?
Busa naa natong katawhan, lokal nga kagamhanan labi na sa ang-ang sa barangay, ang paglatid sa maayong pagpangandam sa mga alternatibong tinubdan sa kuryente aron magmalampuson ang unang poll automation.