NAKAIPSOT ang Cebu Sharks-Casino Ethyl Alcohol sa mga kamot sa Ilo-ilo United Royals, 69-68, sa nagpadayon nga Maharlika Pilipinas Basketball League (MPBL) Lakan Cup kagahapon didto sa Valenzuela Astrodome.
Ang walhon ug kahin pambato sa University of San Carlos Warriors nga si William McAloney maoy miluwas sa Sharks human niya makompleto ang three-point play sa himatyong mga segundos aron pakgangon ang ilang duha ka sunodsunod nga kapildihan.
Sa samang higayona, naaswat usab ni McAloney, molupyo sa City of Naga, ang Cebu ngadto sa 3-3 nga baraha.
Daw og sa naglangoy unta ang Sharks paingon sa yanong kadaugan sa dihang nakaposte kini og 61-53 nga singko minutos ang nahabilin sa duwa. Apan sa kalit lang napapas ang maong labaw human mopabuto og dakong rally sa Royals aron sakmiton ang bintaha.
Apan sa panaghugpong nila ni McAloney, Joel Lee Yu ug Raffy Octobre, ang Sharks ni coach Norberto “Titing” Manalili nakabawi, 64-63, hangtod nga ilang naposte ang muna sa ginhawa nga kadaugan. (JBM)