TULO ka mga babaye, pulos asawa nga parehong naluwas sa 7.2 magnitude earthquake nga niigo sa Bohol niadtong Oktubre 15, 2013 apan, ang ilang pamilya nagpuyo sa barongbarong human naguba ang ilang balay sa linog. Dili na normal ang pagpuyo.
Bisan sa ilang kahmtang, sila si Anita, Gina, ug Natividad malaumon nga makabangon sa umaabot pinaagi sa pagpa ningkamot.
Ug ang Modified Core Shelter Program (MCSAP) naghatag og paglaum sa ilang mga damgo nga matuman.
“Malipayon kaayo ko nga nahataga na kanamo kining balay. Naa na gyud mi kapuy-an. Wala baya gyud mi laing kakuhaan para makabarog mi og balay. Lisod kayo kay pangisda ra among pangita." paambit ni Anita Enriquez, nakadawat sa MCSAP n Buenavista, Bohol.
“Nalipay gyud ko kay nakapuyo na gyud mi nga kumpleto na gyud ang balay, dili pareha sauna nga nagtabon-tabon lang mi, nag barong-barong lang mi nga kanang makita pa gyud among atop. Ampingan gyud ko ni. Dili nako ni ibaligya, para ra gyud ni sa akong pamilya,” matod ni Gina Canino, laing nakadawat o balay sa Sagbayan.
Si Natividad Caguisa sa Loon, Bohol uban sa iyang paralitiko nga bana nalipay sa tabang nga balay.
“Mapasalamaton kayo kami nga na-turnover na gayud kini sa amoa kining balay, hamugaway na among pagpuyo," dason niya.
Ang beneficiaries core shelter project mapasigarbuhon nga nipaambit sa pagkatukod sa ilang mga balay.
Sama sa beneficiaries nga sila si, Anita, Gina ug Natividad, nitampo usab og mga kawayan o “lipak” alang sa bungbong. Nitabang usab sila sa buho sa yuta o nitabang sa tanang buluhaton.
Ang tulo ka mga babaye naluwas sa trahedya ug epekto sa maong hitabo apan, naglaum gihapon nga moumento ang ilang pagpuyo ug panginabuhi.
Natabangan sila nga makapanday sa bag-ong balay pinaagi sa pag-abag sa Department of Social Wlefare and Development (DSWD), Habitat for Humanity, provincial ug municipal government units sa Bohol ug natuman ang ilang mga damgo karon. (PR)