SA LABING unang higayon, gipaubos ang nasod sa usa ka “national dengue alert” tungod kay niabot na sa sobra sa 100,000 ka kaso sa dengue sulod sa unom ka buwan.
Si Health Secretary Francisco Duque III nibutyag nga gikan Enero 2019 hangtod Hunyo 29, niabot na sa 106,630 ang kaso sa dengue sa tibuok nasod.
Matod niya, ang dengue alert nagpatugbaw lang sa anti-dengue activities, prevention and control ug nagpaandam sa barangay dengue brigades ug hospital dengue fast lanes.
Matod niya, wala’y national epidemic ug klaro ang ilang tumong nga mapalapdan pa ang awareness sa publiko kabahin niining nagkasaka nga kaso sa dengue.
Nalakip sa top three ang Central Visayas sa aduna’y labing daghang kaso sa dengue nga nilapas na sa ilahang “epidemic threshold.” Apan si Regional Director Jaime Bernadas sa Department of Health (DOH) 7 nagkanayon nga nemenos na ang kaso sa Central Visayas.
Apan kay gauwan-uwan naman, matod ni Bernadas, “vigilant gihapon for new strains kay four different strains man ang dengue and seasonal ang ila occurrence one or two strains at a time.” Abril 2019 dihang nag-una ang Central Visayas sa mga rehiyon sa nasod nga aduna’y labing daghang kaso sa dengue. Karon anaa nalang kini sa ikatulo.
Sa labing uwahing kaso sa Regional Epidemiology and Surveillance Unit (RESU) 7, niabot na sa 9,149 ka kaso ang natala gikan Enero 2019 hangtod Hulyo 6, diin natala usab ang 60 ka patay.
Kini 159% ang pagtaas itandi sa record niadtong 2018 nga anaa kang sa 3,534 ka kaso ug 23 ang patay.
Nagkadaiyang mga dengue outbreak response ang napahigayon na sa DOH 7 sa Central Visayas.
Sa Sugbo nahimo na nila kini sa Bantayan, Madridejos, Santa Fe ug sa Dalaguete.
Sa Bohol, nahimo na kini sa Talibon, Buenavista, ug Tubigon, ug Mabinay, Sta. Catalina ug Basay sa Negros Oriental.
Mao kini ang mga dapit nga aduna’y mga tag-as ang kaso sa dengue diin outbreak level na kini. (HBL)