DRUG den sa Sitio Tabuc Sapa, Barangay Jaclupan, siyudad sa Talisay gironda sa Philippine Drug Enforcement Agency (PDEA) 7 uban sa Provincial Intelligence Branch ug Talisay City police station nga miresulta sa pagkasikop sa drug den maintainer ug laing lima nga naaktohan nanuyop.
Moabot sa 15 grams sa gituohang shabu ang nasakmit nga mobalor ang tanan sa P102,000 lakip sa nakuha ang usa ka .38 calibre revolver.
Ang mga nangasikop mao si Maica Jaberina nga maoy nagpadagan sa drug den samtang ang mga naatlan nga naa sa sulod mao silang Roldany Papas, Ruel Carael, William Caparida ug Virgillo Jabarina samtang usa usab ang miiskapo nga mao si Junil Cabaluna ang live in partner ni Jaberina.
Matod ni Leai Alcantara, information officer sa PDEA 7, nga kapin na sa tulo ka bulan nga nagpadagan sa drug den sila si Jaberina ug Cabaluna sa maong dapit. (AYB)