Chan minando pagpatuman sa re-blocking sa nasunogang dapit

HUMAN miigo ang duha ka insidente sa sunog sa managlahing barangay sa dakbayan sa Lapu-Lapu, sugdan na sa pag-reblock karon sa kagamhanan ang luna kon asa nahimutang ang gatusan ka mga pamilya nga nabiktima sa sunog.

Gimandoan na sa Mayor sa dakbayan sa Lapu-Lapu, Junard “Ahong” Chan nga sugdan na ang pag-reblock sa mga pamilya nga nabiktima sa dakong sunog niadtong weekend.

Matod sa mayor nga kinahanglang dalion pag reblock ang luna aron masuta kon asa lang kutob makapuyo ang mga biktima tungod kay pribado kini.

“For the meantime nga wala pa ta’y kabalhinan ninyo ibalik sa tamo sa inyong lugar nga inyong nahimutangan, kanang inyong nahimutangan nga lugar we need to reblockling kay mao nay nahitabo nga naglisod ang atong mga bombero sa pagkumbate sa maong kayo kay wala gyuy klarong agianan," matod ni Chan..

Dugang ni Chan nga ang mga nagpaabang o nag negosyo ug paabangan dili na gyud makabalik sa lugar.

Gipaguba usab sa mayor ang kural sa Hoopsdome nga nag-uwang sa mga biktima tungod kay kon duna’y mga insidente dili kini dayon marespondehan tungod kay wa’y agian ang responders.

“Panahon sa sunog gibak-bak ang fence aron makaagi ang mga bomber, so ako silang giingnan nga ang katong gibak-bak sa mga bomber ato tong butangan ug pultahan o gate just in case ug naay emergency makaagi sila,” dason sa mayor.

Hinuon sa ipahigayon nga re-blocking, matod ni Chan, mugamay nalang ang area nga maakopar sa mga biktima.

Mahinumdoman nga muabot sa 200 ka panimalay ang gilamoy sa dakong kayo diha sa Purok Ube, Barangay Gun-ob nga nagbilin ug muabot sa P500,000 nga danyos niadtong Hulyo 13.

Gisegundahan usab ang maong insidente niadtong Hulyo 14, diha sa Sitio Bato sa Brgy. Mactan sa nahisgutang syudad diin muabot sa 60 ka panimalay ang gilamoy sa kayo.

Nagsugod kini sa panimay ni Faiden Pacilan alas 7:45 sa gabii, giisa pa kini ngadto sa 2nd alarm ug gideklara nga fire out alas 10:20 sa kagabhion.

Muabot sa P250, 000 usab ang gibiling danyos sa maong sunog sa nahisgutang dapit .

Bisan paman sa nahitabo wala hinuoy nakalas sa maong insidente. (ANV)